ვახტანგ ბოჭორიშვილის სახელობის კლინიკაში ახალი კორონავირუსით ინფიცირებული პაციენტების მდგომარეობა დამაკმაყოფილებელია. ამის შესახებ ჟურნალისტებს საავადმყოფოს კლინიკურმა დირექტორმა კახა იშხნელმა განუცხადა. მისივე განმარტებით, ვირუსით ინფიცირებულთა ახალი შემთხვევა მათ კლინიკაში ჯერჯერობით არ დაფიქსირებულა.
როგორც იშხნელმა აღნიშნა, გუშინ ლუგარის ლაბორატორიიდან 7 პაციენტის ტესტთან დაკავშირებით უარყოფითი პასუხები მიიღეს. მისივე განმარტებით, კლინიკაში ასევე გუშინ ღამით 2 პაციენტი შეიყვანეს, რომელთა ტესტების პასუხებს ელოდებიან.
„საბედნიეროდ, ახალი შემთხვევა არ დაფიქსირებულა , 16 პაციენტი გვყავს. მათ შორის 4 დადასტურებული შემთხვევა. დანიშნულების მიხედვით მიმდინარეობს მკურნალობა. მდგომარეობა სტაბილურად დამაკმაყოფილებელია. არც ერთ მათგანს კლინიკური გართულება არ აღენიშნება“, - განაცხადა კახა იშხნელმა და დასძინა, რომ მიუხედავად იმისია, რომ ერთ-ერთ პაციენტს პნევმონია აქვს, მდგომარეობა სტაბილურია და გაუმჯობესებულიც კი არის.