ბოლო ორ კვირაში, საქართველოში ჰაერის დაბინძურების მაჩვენებელი შემცირებულია

საქართველოში ჰაერის დაბინძურების მაჩვენებელი შემცირებულია. გარემოს დაცვისა და სოფლის მეურნეობის სამინისტროს ატმოსფერული ჰაერის სამმართველოს ხელმძღვანელის, ნოე მეგრელიშვილის განცხადებით, ჰაერში დამაბინძურებლების ზღვრული მნიშვნელობების გადაჭარბება 15 მარტიდან არ დაფიქსირებულა.

სპეციალისტები აღნიშნულს მთავრობის მიერ ბოლო კვირებში მიღებულ გადაწყვეტილებებს, მათ შორის ფრენების აკრძალვას, ტრანსპორტის მოძრაობის შეზღუდვას, ასევე ქალაქებში ავტომანქანების შემცირებულ რაოდენობას უკავშირებენ.

როგორც ნოე მეგრელიშვილმა "ინტერპრესნიუსს" განუცხადა, ყველაზე მკვეთრად ჰაერში აზოტისოჟანგის შემცვლელობაა შემცირებული.

ნოე მეგრელიშვილის თქმით, ქვეყნის კანონმდებლობით და საერთაშორისო სტანდარტით, აზოტისოჟანგისთვის წლიური ნორმა არის 40 მიკრო გრამი/ მეტრ კუბში, დღეს კი ქვეყნის მასშტაბით, ყველა სადგურზე ეს მონაცემი საშუალოდ 25-30-ის ფარგლებში ფიქსირდება.

"დღეისათვის, ჰაერის ხარისხის მონიტორინგს 4 უმსხვილეს ქალაქში ვაწარმოებთ, 8 ავტომატური სადგურით. ეს ქალაქებია: თბილისი, ბათუმი, ქუთაისი და რუსთავი. ყველა ამ სადგურზე ძირითადი დამბინძურებლების შემცირება ფიქსირდება. ქვეყანაში პრობლემური იყო მყარი ნაწილაკები და აზოტისოჟანგი. იქიდან გამომდინარე, რომ დაბინძურების წყაროები შემცირდა, განსაკუთრებით ეს ეხება ავტოტრანსპორტის ნაკადის მკვეთრ შემცირებას, ამან გამოიღო თავისი დადებითი შედეგი და 15 მარტიდან არცერთი დამაბინძურებლის ზღვრული მნიშვნელობები არ არის გადაჭარბებული. განსაკუთრებით ეს იგრძნობა აზოტისოჟანგის შემთხვევაში. 11 მარტიდან, მას შემდეგ რაც ჯანმრთელობის მსოფლიო ორგანიზაციამ პანდემია გამოაცხადა, ცალსახად ვხედავთ, რომ ჰაერში აზოტისოჟანგის კონცენტრაცია, რომელიც არის ძირითადად, ავტოტრანპორტის გამონაბოლქვი, აშკარად მოდის ქვევით," - განაცხადა ნოე მეგრელიშვილმა.

მისივე თქმით, აზოტისოჟანგის ყველაზე მკვეთრი კლება გზისპირა სადგურებზეა.

"სადგურებზე, რომელიც განთავსებულია გზის პირას, დატვირთული ქუჩების გასწვრივ, მათ შორის, ეს არის წერეთლის გამზირზე მდებარე სადგური, სადაც აშკარად გვიფიქსირდება კლება, ბათუმშიც ასევე გზისპირა სადგურია და აზოტისოჟანგის სერიოზული კლებაა. კლებაა ქუთაისში, მაგრამ არა იმ დოზით, როგორც ბათუმსა და წერეთელის გამზირზე. როცა საგანგებო მდგომარეობა მოიხსნება, რა თქმა უნდა, ისევ დაიტვირთება გზები და მატება ეტაპობრივი გვექნება, მაგრამ თუ განვითარდება საზოგადოებრივი ტრანსპორტი, საზოგადოებრივი ცნობიერება ამაღდება და მოქალაქეები იგივე ველოსიპედით ან ფეხით ივლიან, ამ შემთხვევაში, მატება არ უნდა იყო ისეთივე მაღალი, როგორიც გვქონდა. ჰაერში გოგირდის დიოქსიდი, ნახშირჟანგი, ყოველთვის იყო ისედაც გაცილებით უფრო დაბალი კონცენტრაციით, ვიდრე ევროპული სტანდარტით იყო გაწერილი," - განაცხადა მეგრელიშვილმა.

გარდა ამისა, მისი ინფორმაციით, დღესაც პრობლემური არის ჰაერში მყარი ნაწილაკები შემცვლელობა.

"თუმცა, მის ფორმირებაში ანუ მყარი ნაწილაკების კონცენტრაციის შექმნაში, ტრანსპორტს იმხელა წვლილი არ მიუძღვის, ეს არის სამშენებლო და სამრეწველო სექტორის გამო. ეს არის იგივე შეშის მოხმარებისა და საზღვრებს გარედან შემოსული მტვერის გამო. მყარი ნაწილაკების შემცირების ასეთი მკვეთრი სურათი არ გვაქვს. რა თქმა უნდა, იქაც გვაქვს მცირედით კლება, მაგრამ არა მკვეთრი, რადგან უმსხვილესი სამრეწველო და სამშებელო სექტორი კვლავაც აგრძელებს მუშაობას. წყალის დაბინძურებაზე ინფორმაცია არ გვაქვს, რადგან წყლის სიჯების აღება ამ ეტაპზე შეჩერებულია, არსებული მდგომარეობიდან გამოდმინარე. თან, ამასთნ ასეთი მყისიერი შედეგი შეუძლებელია გვქონდეს. წყალში გამოჩნდება რამდენიმე თვის შემდეგ თუ ასე გაგრძელდა," - განაცხადა მან.

რაც შეეხება ჰაერში ტყვიის შემცვლელობას, ნოე მეგრელიშვილის თქმით, მონიტორინგის შედეგებით დასტურდება, რომ წლებია ჰაერში ტყვია არის ზღვარზე გაცილებით უფრო დაბალი კონცენტრაციით.

შეგახსენებთ, რომ კონორავირუსთან დაკავშირებით შექმნილი ვითარების გამო საქართველოში საგანგებო მდგომარეობაა. ბოლო ერთი თვის განმავლობაში, მთავრობის გადაწყვეტილებით, აიკრძალა ფრენები, საქალაქთაშორისო ტრანსპორტის მოძრაობა, სამარშრუტო ტაქსები უშუალოდ დედაქალაქში, დაიხურა სავაჭრო ობიექტები, რესტორნები და სხვადასხვა დაწესებულება, ორგანიზაციების დიდი ნაწილი კი მუშაობის ონლაინ რეჟიმზე გადავიდა. ხელისუფლების მოწოდებაა, მოსახლეობა დარჩეს სახლებში, რის გამოც ქალაქებში ავტოტრანპორტის მოძრაობა შემცირებულია.

ლევან ბოძაშვილი - ახლა არაორდინარული, არასტანდარტული გადაწყვეტილებების დროა
ქართული პრესის მიმოხილვა 26.03.2020
სოსო არჩვაძე - ეროვნული ვალუტის კურსის რყევამ  შეიძლება სერიოზულად დააზიანოს ის შედეგები, რაც მიღწეულია მთავრობის მიერ
„მაკდონალდსი“ ლუგარის ლაბორატორიის პერსონალის კვებაზე ზრუნავს
„ვენდი“ და „დანკინი“ მიწოდების უკონტაქტო სერვისზე გადადის
კომპანია "ლისი დეველოპმენტმა" მთავრობის მიერ შექმნილ StopCov ფონდში 50 000 ლარი გადარიცხა
„ვისოლ ჯგუფი“ თბილისის მერიასთან ერთად მარტოხელა მოხუცებს ყოველდღიური მოხმარების საგნებითა და საკვები პროდუქტებით მოამარაგებს
„სოკარმა“ STOPCOV ფონდის მხარდასაჭერად საქართველოს ბიზნეს ასოციაციაში 200 000 ლარი ჩარიცხა
ბაზისბანკის ვიდეობანკი ციფრული სერვისების გასააქტიურებლად
შპს "ფერიმ" და სს "დარიალი ენერჯიმ" კორონავირუსთან ბრძოლის ფონდს ნახევარი მილიონი ლარი გადაურიცხა
ლიბერთის პროგრამა აპრილის პენსიების წინასწარ ჩარიცხვის მიმართულებით ყველა ასაკის პენსიონერზე გავრცელდება