თავდაცვის სამინისტროს მოსამსახურეები განისაზღვრა, ვისაც დაკავებული თანამდებობის მიუხედავად, იარაღის ტარების უფლება ექნება
თავდაცვის სამინისტროს ინიციატივით, საქართველოს მთავრობის დადგენილებაში “იმ თანამდებობის პირთა ნუსხის დამტკიცების შესახებ, რომლებსაც აქვთ სამსახურეობრივ-საშტატო იარაღის ტარების უფლება” ცვლილება შევიდა. როგორც “ინტერპრესნიუსს” თავდაცვის სამინისტროდან აცნობეს, დადგენილების თანახმად, თავდაცვის სამინისტროს სისტემის მოსამსახურე, რომელსაც მინიჭებული აქვს უფროსი და უმაღლესი სპეციალური წოდება ან უფროსი ოფიცრისა და უმაღლესი ოფიცრის სამხედრო წოდება, დაკავებული თანამდებობის მიუხედავად, უფლებამოსილი იქნება ატაროს სამსახურეობრივ-საშტატო იარაღი.
მათივე ცნობით, აღნიშნული გადაწყვეტილებით, სამსახურეობრივ-საშტატო იარაღის ტარების უფლება დამოკიდებული აღარ იქნება მხოლოდ თანამდებობაზე, რაც თავდაცვის სისტემის მაღალი რანგის ოფიცრებს ამ თვალსაზრისით ათანაბრებს სხვა უწყებების (იგივე წოდების მქონე) თანამშრომლებთან.
