ჩატარებული სკრინინგის საფუძველზე, გორის სამხედრო ჰოსპიტალის საკარანტინო სივრცეში მოთავსებული პირებიდან, დამატებით, 10 საეჭვო შემთხვევაზე ნიმუშები ლუგარის ლაბორატორიაში გაიგზავნა. აღნიშნული ნიმუშების პასუხები ხვალ გახდება ცნობილი.

თავდაცვის სამინისტროს ქვემდებარე სამედიცინო დაწესებულებაში აცხადებენ, რომ ამ დროისთვის, სამხედრო ჰოსპიტალის სტაციონარში ახალი კორონავირუსით ინფიცირებული 9 პაციენტი რჩება, რომელთაგან 6 ეროვნული გვარდიის სამოქალაქო ოფისის დასუფთავების სამსახურის თანამშრომელია, მათგან ორს პნევმონია აღენიშნება. დანარჩენი 3 ინფიცირებულიდან კი, ერთის - 61 წლის პაციენტის მდგომარეობა მეტად საყურადღებოა.

ჰოსპიტალის საკარანტინო ზონაში დაკვირვების ქვეშ იმყოფება 41 ადამიანი, შიდა ქართლის მუნიციპალიტეტებში კი, რამდენიმე ათეული პირი თვითიზოლაციის რეჟიმშია, თუმცა, ბოლო 24 საათის განმავლობაში, რეგიონში, საგანგებო მდგომარეობის რეჟიმის და თვითიზოლაციის წესების დარღვევის ათზე მეტი ფაქტი დაფიქსირდა. თითოეული დამრღვევი პირი 3000 ლარით დაჯარიმდა. საჯარიმო სანქციის პარალელურად, თვითიზოლაციის წესის დამრღვევები იძულების წესით გადაიყვანეს კარანტინში.