რესპუბლიკური საავადმყოფოს დირექტორის, ლევან გოფოძის ინფორმაციით, ამჟამად საავადმყოფოში 40 პაციენტი იმყოფებადა მათგან არც ერთს არ აქვს კორონავირუსი დადასტურებული.
როგორც გოფოძემ ჟურნალისტებთან საუბრისას აღნიშნა, გუშინ ტესტირება 20 პაციენტს ჩაუტარდა და ყველა შემთხვევაში ნეგატიური პასუხი მიიღეს.
„ამჟამად რესპუბლიკურ საავადმყოფოში 40 პაციენტია. მათგან კორონავირუსზე არცერთი დადასტურებული პაციენტი არ გვყავს. გუშინ კვლევა ჩაუტარდა 20 პაციენტს და ყველა შემთხვევაში ნეგატიური პასუხი მივიღეთ. დღეს გაეწერა 5 პაციენტი კიდევ რამდენიმე წავა კარანტინში და თვითიზოლაციაში,“ - აღნიშნა ლევან გოფოძემ.
რესპუბლიკური საავადმყოფოს დირექტორმა მარნეულიდან გადმოყვანილ რეანიმაციაში მყოფ პაციენტზეც ისაუბრა. მისი თქმით, აღნიშნულ პაციენტს კორონავირუსი არ აქვს, თუმცა აღენიშნება ორმხრივი პნევმონია და ამიტომ მისი ჯანმრთელობის მდგომარეობა სტაბილურად მძიმეა.
„ჩვეულ რეჟიმში მიდის მუშაობა. რეანიმაციაში მყოფი პაციენტის მდგომარეობა სტაბილურად მძიმეა, თუმცა რაღაც პარამეტრები ყოველდღიურად უმჯობესდება. ვფიქრობთ, რომ თავი უნდა გავართვათ მის ჯანმრთელობის მდგომარეობას მიუხედავად იმისა, რომ ამ პაციენტს ბევრი რისკი აქვს. ეს არის მარნეულიდან გადმოყვანილი პაციენტი, რომელსაც ჰქონდა ორმხრივი პნევმონია და მძიმე სეპტიური შოკი, მაგრამ არ დაუდასტურდა კორონავირუსი და პლუს ამას არ ჰქონდა შეხება იმ ცნობილ კლასტერთან,“ - განაცხადა ლევან გოფოძემ.