საქპატენტი, ევროკავშირის პირველი არაწევრი ქვეყნის ინტელექტუალური საკუთრების უწყებაა, რომელმაც დიზაინის გრაფიკულად გამოსახვას საკუთარი პრაქტიკა ევროკავშირის ინტელექტუალური საკუთრების ქსელის (EUIPN) წევრი უწყებების საერთო პრაქტიკას შეუსაბამა. ამის შესახებ „ინტერპრესნიუსს“ „საქპატენტიდან“ აცნობეს.
მათივე ცნობით, დღეს, საქართველოს ინტელექტუალური საკუთრების უწყებამ გამოაქვეყნა აღნიშნული პრაქტიკის დოკუმენტი, რომელიც ეხება დიზაინის გრაფიკულად გამოსახვას და რაც წარმოადგენს საქართველოს ინტელექტუალური საკუთრების ეროვნული ცენტრის - საქპატენტის და ევროკავშირის ინტელექტუალური საკუთრების უწყების (EUIPO) ერთობლივი მუშაობის შედეგს.
„პრაქტიკის დოკუმენტის გამოქვეყნების მთავარი მიზანი გამჭვირვალობის, სამართლებრივი სიცხადის და პროგნოზირების გაზრდაა განმცხადებლების, ექსპერტების და ნებისმიერი სხვა დაინტერესებულ პირისთვის. დოკუმენტი შეიცავს, მკაფიო და სრულყოფილ ახსნა-განმარტებას იმ პრინციპებისა, რომელიც საქპატენტის მიერ დიზაინის განაცხადის მიღებისას იქნება გამოყენებული“ , - ნათქვამია ინფორმაციაში.
ცნობისთვის, დოკუმენტი ხელმისაწვდომია ქართულ და ინგლისურ ენებზე, შემდეგ მისამართზე: http://www.sakpatenti.gov.ge/ka/page/191/