დედაქალაქის მერის კახა კალაძის განცხადებით, თუ ოპოზიციას ანტიკრიზისულ გეგმასთან დაკავშირებით საკუთარი ხედვა აქვს, შეუძლია წარადგინოს. როგორც მან ჟურნალისტებთან საუბრისას განაცხადა, ახლა პოლემიკის და დაპირისპირების დრო არ არის.
„თუ ოპოზიციას აქვს რაიმე საინტერესო ხედვა ამაზე, შეუძლია წარმოადგინონ, არანაირ პრობლემას არ წარმოადგენს. ახლა პოლემიკის და დაპირისპირებების დრო ნამდვილად არ არის იმიტომ, რომ ყველა ვებრძვით ამ უდიდეს პრობლემას, უხილავ მტერს, რომელსაც ჰქვია კორონავირუსი“, - განაცხადა კალაძემ.
ჟურნალისტის შეკითხვაზე, თუ რა ვადებში იქნება მთავრობის მიერ წარმოდგენილი ანტიკრიზისული გეგმა, კალაძემ განაცხადა, რომ ყველაფერს თავისი დრო აქვს.
„წარმოდგენილი იქნება, ყველაფერს თავისი დრო აქვს. ეს პროცესია, რომელიც არავინ იცის როდის დამთავრდება, რა იქნება ხვალ. შესაბამისად, ჩვენ ვმუშაობთ ამაზე“, - აღნიშნა მან.