ნიდერლანდებში, კორონავირუსის გამო დაკეტილი მუზეუმიდან, ჰოლანდიელი ფერმწერის, ვინსენტ ვან გოგის ტილო მოიპარეს. ინფორმაციას ადგილობრივი პოლიცია ადასტურებს.

ამსტერდამიდან 32 კილომეტრში მდებარე Singer Laren-ის მუზეუმიდან ბოროტმოქმედებმა ნახატი შუაღამეს გაიტანეს. განგაშის სიგნალის შემდეგ, ადგილზე მისულ სამართალდამცველებს ნახატი, სახელად „პასტორის სახლის ბაღი გაზაფხულზე ნიუენენში“ იქ აღარ დახვდათ. ადგილზე ექსპერტ-კრიმინალისტები მუშაობენ.

მუზეუმის გენერალურმა დირექტორმა მომხდარს შემზარავი ფაქტი უწოდა.

ტილო „გაზაფხულის ბაღის“ სახელითაც არის ცნობილი და ის ზეთის საღებავებით 1884 წელს არის შესრულებული. ნახატი გრონინგერის მუზეუმმა Singer Laren-ს დროებით გადასცა. ადგილობრივი მედია იუწყება, რომ ტილოს ღირებულება 1-დან 6 მილიონ ევრომდე მერყეობს.