საკონსტიტუციო სასამართლოს მოსამართლის არჩევნებს "ახალი საქართველოს" თავმჯდომარე, გიორგი ვაშაძე ეხმაურება. მისი შეფასებით, ოპოზიციურმა პარტიებმა კონსენსუსის საფუძველზე ხელი მოაწერეს საკონსტიტუციო და ზოგადად, სასამართლო რეფორმის პაკეტს, სადაც საკონსტიტუციო და უზენაესი სასამართლო უნდა გაერთიანდეს.
ამასთან, ვაშაძე მიიჩნევს, რომ დღეს დაჩქარებულად მიმდინარე პროცესი დროებითია. "იქ, სადაც "ქართულ ოცნებას" პოლიტიკური ინტერესი აქვს, პირიქით, დაჩქარებულად მიდიან. რა თქმა უნდა, მათი ინტერესია, რომ საკონსტიტუციო სასამართლოს მოსამართლე დროულად შეარჩიონ, მაგრამ ყველაზე მეტად მაიმედებს ის, რომ ოპოზიციურმა პარტიებმა ყველამ ერთად ხელი მოვაწერეთ საკონსტიტუციო და ზოგადად, სასამართლო რეფორმის პაკეტს, სადაც საკონსტიტუციო და უზენაესი სასამართლო უნდა გაერთიანდეს. სწორედ ეს ცვლილება მთლიანად შეცვლის ვითარებას, რომელიც დღეს სასამართლო სისტემაში არსებობს. ეს არის ოპოზიციურ პარტიებს შორის კონსენსუსი და ჩვენ მის განხორციელებას დავიწყებთ. დღეს რაც არ უნდა დააჩქარონ, ეს ყველაფერი დროებითია", -აცხადებს გიორგი ვაშაძე.