ვახტანგ ბოჭორიშვილის სახელობის კლინიკაში კორონავირუსით ინფიცირებული 7 პაციენტია მოთავსებული, რომელთაგან ორს კორონავირუსი გუშინ დაუდასტურდა, - ამის შესახებ ბოჭორიშვილის სახელობის კლინიკის სამეთვალყურეო საბჭოს თავმჯდომარე მაკა სოლოღაშვილმა ჟურნალისტებს განუცხადა.
მისი ინფორმაციით, ორი ახალი ინფიცირებულის მდგომარეობა საშუალო სიმძიმისაა. სოლოღაშვილის თქმით, ძველ პაციენტებში გამოჯანმრთელების ტენდენცია შეინიშნება.
„ბოჭორიშვილის კლინიკაში დღეს ბოქსირებულ განყოფილებაში მკურნალობს 14 პაციენტი. აქედან 7 პაციენტს დადასტურებული აქვს კოვიდ 19. გუშინდელი კვლევიდან 2 პაციენტს დაუდასტურდა კორონავირუსი და ორი პაციენტი დღეს ჩაერთვება კვლევაში. დადასტურებული პაციენტების მდგომარეობა არის საშუალო სიმძიმის. ძველ 5 პაციენტში შეინიშნება გამოჯანმრთელების კარგი ტენდენცია. ამ დღეებში მოხდება ლაბორატორიული მონაცემების გადამოწმება და შემდგომ დადგება მათი გაწერის საკითხი,“ - განაცხადა სოლოღაშვილმა.
მისი თქმით, აღნიშნული ორი შემთხვევიდან ერთი შიდა გადადებაა და ინფიცირების წყარო ცნობილია, ხოლო მეორე - გერმანიის კლასტერია.
„ერთი პაციენტი არის შიდა გადადება, მეორე პაციენტი არის გერმანიის კლასტერი, რომელთანაც გამოხატული იყო პნევმონია გარკვეული პერიოდის მანძილზე,“ - აღნიშნა მან.
სოლოღაშვილის ინფორმაციით, ბოჭორიშვილის კლინიკაში მოთავსებული ორი მცირეწლოვანის ჯანმრთელობის მდგომარეობა მკურნალობას ექვემდებარება.
„ორივე მცირეწლოვანის რენდგენოლოგიური მონაცემები და კომპიუტერული ტომოგრაფიის მონაცემები ძალიან კარგად ექვემდებარება მკურნალობას ,“ - აღნიშნა მან.