დავით ბაქრაძის შეფასებით, ხელისუფლების მხრიდან კომუნალური ვაუჩერების გაცემა სწორი მიმართულებით გადადგმული ნაბიჯია, მაგრამ საკმარისი არ არის

„ევროპული საქართველოს“ ლიდერის, დავით ბაქრაძის შეფასებით, ხელისუფლების მხრიდან კომუნალური ვაუჩერების გაცემა სწორი მიმართულებით გადადგმული ნაბიჯია.

როგორც ბაქრაძემ განაცხადა, აღნიშნული ინიციატივა კარგია, მაგრამ საკმარისი არ არის.

„კომუნალური ვაუჩერის გაცემა არის სწორი მიმართულებით გადადგმული ნაბიჯი და კარგია, რომ დაგვიანებით, მაგრამ ხელისუფლებამ დაიწყო კონკრეტულ ინიციატივებზე საუბარი. ეს ინიციატივა იყო ასევე „ევროპული საქართველოს“ ანტიკრიზისული გეგმის შემადგენელიც, მაგრამ მიგვაჩნია, რომ ეს არის არასაკმარისი. ამიტომ, ხელისუფლებას ვთავაზობთ, იფიქროს დამატებით ნაბიჯებზე. პირველი - სახელფასო კომპენსაციის გაცემა იმ ადამიანებისთვის, ვინც დაკარგა სამსახური ან არ დაკარგა სამსახური, მაგრამ უხელფასო და უვადო შვებულებაშიაა; მეორე- ერთჯერადი დახმარების გაცემა სოციალურად ყველაზე გაჭირვებული ფენებისთვის; მესამე -საპენსიო შენატანების გაჩერება წლის ბოლომდე და უკვე არსებული თანხის გატანის შესაძლებლობის მიცემა მოქალაქეებისთვის და ბოლოს, გადასახადების შემცირება და მათ შორის, წელს, საშემოსავლო და ქონების გადასახადების განულება, რის გარეშეც ბევრი ბიზნესი უბრალოდ დაიხურება. ჩვენ ვთავაზობთ ხელისუფლებას ამ ნაბიჯებს და იმ შემთხვევაში თუ ხელისუფლება გაიზიარებს ამ ნაბიჯებს და გამოვა ასეთი კომპლექსური გეგმით, ამ გეგმას ექნება ჩვენი მხარდაჭერა და ასეთი კომპლექსური გეგმით ჩვენი ეკონომიკა და მოქალაქეები შედარებით უმტკივნეულოდ გაივლიან ამ ძალიან მძიმე და კრიზიულ პერიოდს“, - აცხადებს ბაქრაძე.

შეგახსენებთ, რომ მთავრობის გადაწყვეტილებით, თითოეულ მოქალაქეს, ვინც თვის განმავლობაში მოიხმარს 200 კილოვატზე ნაკლებ ელექტროენერგიას და ასევე, 200 მ3-ზე ნაკლებ ბუნებრივ აირს, 3 თვის განმავლობაში - მარტში, აპრილსა და მაისში სრულად დაუფინანსებდა გადასახადები.

კორნელი კაკაჩია - თუ ადგილობრივ არჩევნებში გახარიასა და ვასაძის პარტიები მიიღებენ მონაწილეობას, „ქართულ ოცნებას“ პროპორციული სისტემით  ხმების 43%-ის აღება გაუჭირდება
ქართული პრესის მიმოხილვა 17.05.2021
პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
“მეამა ქოლექთის” ყავის უნიკალური კოქტეილები ბათუმშია