ქვემო ქართლში სახელმწიფო რწმუნებულის შოთა რეხვიაშვილის განცხადებით, რუსთავის საკრებულოს დეპუტატი კორონავირუსზე ტესტის პასუხს ელოდება. მისივე თქმით, საკრებულოს სრული შემადგენლობა თვითიზოლაციაში გადავიდა.

„ჩემი ინფორმაციით, საკვლევი მასალა 2-დან 3 საათამდე პერიოდშია აღებული და გადაგზავნილი, ჯერ ოფიციალური დადასტურება არ არის, თუმცა, გარკვეული სიმპტომები დაავადების არის ტემპერატურაში გამოხატული.

მიუხედავად იმისა, რომ რუსთავის საჯარო მოხელის შემთხვევაში დადასტურებული ჯერ არაფერი არ არის covid 19-ზე, წინსწრებით, საკრებულოს შემადგენლობა, აპარატი, სრულად საკრებულოს შტატი არიან მკაცრ თვითიზოლაციაში ოჯახებში და ოჯახურადაც დაცული აქვთ ის სტანდარტი, რაც არის გათვალისწინებული ამ შემთხვევაში“,- განაცხადა შოთა რეხვიაშვილმა.

რაც შეეხება კონტაქტებს, როგორც რეხვიაშვილი ამბობს, დადასტურების შემთხვევაში ამ მხრივ მოკვლევა იქნება ჩასატარებელი, თუმცა, მისი ინფორმაციით, უკვე გაფრთხილებულია ყველა ის ადამიანი, რომელიც რისკის ქვეშ შეიძლება იმყოფებოდეს.

„იმ შემთხვევაში თუ დადასტურდება covid 19, კვლევა იქნება ჩასატარებელი, სავარაუდო მონახაზი არსებობს, მაგრამ ზუსტი რიცხვი დადგენილი არ არის. მაქსიმალურად არის შესწავლილი კავშირები და გაფრთხილებულია ყველა ის მოქალაქე, სადაც შესაძლო რისკები შეიძლება იყოს“,- განაცხადა შოთა რეხვიაშვილმა.