რესპუბლიკურ საავადმყოფოში სამ პაციენტს კორონავირუსი დაუდასტურდა. როგორც კლინიკის დირექტორმა "ინტერპრესნიუსს“ განუცხადა, მათი მდგომარეობა არ არის მძიმე ან კრიტიკული და არ მოითხოვენ განსაკუთრებულ ღონისძიებებს.

მისივე თქმით, სამივე შემთხვევაში ცნობილია ინფიცირების წყარო.

„როგორც კი შემოვიდნენ სწორედ კონტაქტების გამო, მაშინვე იქნა მიტანილი ეჭვი, რომ შეიძლება, ყოფილიყო კორონავირუსით ინფიცირება. ამიტომაც შემოსვლის დღესვე გაკეთდა ანალიზი. ამ დილას გაკეთებული 14 ანალიზებიდან აღმოჩნდა ეს სამი COVID დადებითი, დანარჩენი ყველა უარყოფითია. ეს პაციენტები იზოლირებულად არიან მოთავსებული და იმყოფებიან დაკვირვების ქვეშ. ხვალ კიდევ გაგრძელდება მათი კვლევები გაკეთდება კომპიუტერული ტომოგრაფიაც და იმისდამიხედვით შემდგომში მივიღებთ გადაწყვეტილებებს, თუ როგორ და რანაირად გაგრძელდეს მკურნალობა. ამ წუთას მათი მდგომარეობა კრიტიკული არ არის, არც ერთი არ არის სუთქვის უკმარისობით“, - განაცხადა ლევან გოფოძემ.

რესპუბლიკურ საავადმყოფოში კორონავირუსით დაინფიცირებულ პაციენტებს შორის არიან რუსთავის საკრებულოს წევრი და მისი მამა.

ცნობისთვის, საქართველოში კორონავირუსით ინფიცირებულთა რიცხვი 134-მდე გაიზარდა, მათ შორის გამოჯანმრთელებულია 26 პაციენტი.