„საპარტნიორო ფონდის“ თანამშრომლები სამი თვის განმავლობაში ხელფასის მესამედს კორონავირუსთან ბრძოლის ფონდში გადარიცხავენ.

როგორც „ინტერპრესნიუსს“ „საპარტნიორო ფონდიდან” აცნობეს, აღნიშნულით ფონდის თანამშრომლები საქართველოს მთავრობისა და საპარლამენტო უმრავლესობის წევრების ინიციატივასა და მოწოდებას ეხმაურებიან.

„საპარტნიორო ფონდის“ აღმასრულებელი დირექტორის, დავით საგანელიძის განცხადებით, დღეს, საქართველო, ისევე როგორც მთელი მსოფლიო, ურთულესი გამოწვევის წინაშე დგას.

„ეპიდემიასთან ბრძოლაში ერთმანეთის გვერდში დგომა და სოლიდარობა ძალიან მნიშვნელოვანია. პირადად მე, როგორც პროფესიით ექიმი და სამედიცინო განათლების მქონე ფონდის სხვა თანამშრომლები, ასევე, ვუერთდებით პარლამენტის ჯანდაცვის კომიტეტის თავმჯდომარის, ბატონი დიმიტრი ხუნდაძის ინიციატივას, პაციენტებთან საექიმო პრაქტიკულ საქმიანობაში ჩართვასთან დაკავშირებით და ვაცხადებთ მზაობას, საჭიროების შემთხვევაში, ნებისმიერ დროს პროფესიულად ჩავერთოთ ეპიდემიასთან ბრძოლაში,“ - განაცხადა დავით საგანელიძემ.