სპორტის საერთაშორისო დღე 2020 წელს განსხვავებული ფორმატით აღინიშნება

6 აპრილს, მსოფლიო სპორტის საერთაშორისო დღეს აღნიშნავს. პირველად ამ დღის აღნიშვნის ისტორიაში, საერთაშორისო ორგანიზაციის „მშვიდობა და სპორტი“ გადაწყვეტილებით, სპორტის დღისადმი მიძღვნილი ღონისძიებები და აქტივობები ონლაინ სივრცეში გადაინაცვლებს. ამის შესახებ „ინტერპრესნიუსს“ საქართველოს განათლების, მეციერების, კულტურისა და სპორტის სამინისტროდან აცნობეს.

მათივე ცნობით, წელს ამ ღონისძიების მთავარი მესიჯი მსოფლიო მასშტაბით იქნება „მე ვრჩები სახლში და ვვარჯიშობ“. საერთაშორისო ორგანიზაციამ, რომლის სათაო ოფისი მონაკოში მდებარეობს, წელს ამ დღის აღსანიშნავად მონაწილე ქვეყნებისთვის სპეციალური პროტოკოლი შეიმუშავა. „მიღებული რეკომენდაციების გათვალისწინებით, საქართველოს განათლების, მეცნიერების, კულტურისა და სპორტის სამინისტრო და ეროვნული ფედერაცია „სპორტი ყველასათვის“, სპორტით დაინტერესებულ ადამიანებს ონლაინ სივრცეში საინტერესო აქტივობებს სთავაზობს რამდენიმე მიმართულებით: ვიდეო, ფოტო და ესეების კონკურსი, ონლაინ შეხვედრები ცნობილ სპორტსმენებთან და ტრადიციული კამპანია თეთრი ბარათებით. მშვიდობის სიმბოლოს, თეთრ ბარათს წელს დამატებითი დატვირთვა ექნება - სპორტსმენები თეთრი ბარათით გადაღებულ ფოტოსთან ერთად, სოციალურ ქსელში ატვირთავენ კორონავირუსის წინააღმდეგ ბრძოლისთვის საქართველოში შექმნილი ფონდის ანგარიშის ნომერს და ასე მოუწოდებენ საზოგადოებას ქველმოქმედებისაკენ. თეთრი ბარათის კამპანიაში გამოიყენება შემდეგი ჰეშთეგები: #WhiteCard #StopCov სპორტის საერთაშორისო დღის აღსანიშნავად საქართველოს განათლების, მეცნიერების, კულტურისა და სპორტის სამინისტრო აცხადებს რამდენიმე კონკურსს:

1. ვიდეო კონკურსი „მე ვრჩები სახლში და ვვარჯიშობ“ კონკურსში მონაწილეობის მსურველებმა უნდა ჩაწერონ საკუთარი ან ოჯახის წევრის ვარჯიშის ვიდეორგოლი და ატვირთონ საკუთარ Facebook, Instagram ან Twitter-ის გვერდზე, მონიშნონ „საქართველოს ეროვნული ფედერაცია სპორტი ყველასათვის / SportForAll“ და დაწერონ 3 აუცილებელი ჰეშთეგი: #სპორტისდღე2020 #PeaceAndSport #დარჩისახლში კონკურსის აუცილებელი პირობაა 2 ადამიანის გამოწვევა. ვიდეორგოლი სოციალურ ქსელში უნდა განთავსდეს 3-10 აპრილის ჩათვლით. დასაწყისში სამინისტრო გამოავლენს 10 ყველაზე შემოქმედებით (კრეატიულ) და საინტერესო ვიდეოს, რომელთა ავტორებიც სიმბოლურ საჩუქრებს მიიღებენ. შემდეგ ეტაპზე ამ ათი ვიდეოდან გამარჯვებულს გამოავლენს ცნობილი სპორტსმენებისგან შემდგარი ჟიური. კონკურსის გამარჯვებული დაჯილდოვდება სპეციალური პრიზით, სამახსოვრო საჩუქრებით და სპორტსმენების ავტოგრაფებით.

2. ნახატების კონკურსი სკოლის მოსწავლეთა შორის (I-XII კლასები) სკოლის მოსწავლეებმა, 3-10 აპრილის ჩათვლით, ელ. ფოსტაზე sportdep@mes.gov.ge უნდა გამოაგზავნოთ ნახატი მოცემული თემებიდან ერთ-ერთზე: გენდერული თანასწორობა და სპორტი მშვიდობა და სპორტი ნამუშევრები გამოქვეყნდება საქართველოს ეროვნული ფედერაციის „სპორტი ყველასათვის“ ფეისბუქის გვერდზე. გამარჯვებულებს 3 ასაკობრივ კატეგორიაში (I-IV კლასები, V-IX კლასები, X-XII კლასები) სამინისტრო გამოავლენს. გამარჯვებული მოსწავლეები დაჯილდოვდებიან სიმბოლური საჩუქრებით. დამატებით ნომინაციაში „სპორტსმენის რჩეული ნახატი“, საუკეთესო ნახატის ავტორს გამოავლენს ცნობილი სპორტსმენი და გადასცემს სიმბოლურ საჩუქარს.

3. ესეების კონკურსი სკოლის მოსწავლეთა შორის (V-XII კლასები) სკოლის მოსწავლეებმა, 3-დან 10 აპრილის ჩათვლით, ელ. ფოსტაზე sportdep@mes.gov.ge უნდა გამოაგზავნონ ესე მოცემული თემებიდან ერთ-ერთზე: „გენდერული თანასწორობა და სპორტი“ „მშვიდობა და სპორტი“ ესეს მოცულობა არ უნდა აღემატებოდეს 300 სიტყვას. გამარჯვებულები 2 ასაკობრივ კატეგორიაში (V-IX კლასები, X-XII კლასები) გამოვლინდებიან და სიმბოლური საჩუქრებით დაჯილდოვდებიან. გაერო-ს ინიციატივას „სპორტის საერთაშორისო დღე მშვიდობისა და განვითარებისათვის“, საქართველო 2014 წელს შეუერთდა და მას შემდეგ ეს დღე ჩვენს ქვეყანაში საზეიმოდ აღინიშნება. საქართველოში სპორტის საერთაშორისო დღისადმი მიძღვნილი ღონისძიებების ორგანიზატორები განათლების, მეცნიერების, კულტურისა და სპორტის სამინისტრო და ეროვნული ფედერაცია „სპორტი ყველასათვის“ არიან.

ასევე, სპორტის დღის აღნიშვნაში ყოველწლიურად აქტიურადაა ჩართული სხვადასხვა სპორტული ფედერაცია“, - ნათქვამია უწყების მიერ გავრცელებულ ინფორმაციაში.

ნანა ჩაჩუა - არჩევნების წინ არსებულ ვითარებას შევაფასებდი როგორც სიურრეალიზმს, თანაც ისეთს, როგორსაც სალვადორ დალიც კი ვერ წარმოიდგენდა
ქართული პრესის მიმოხილვა 26.10.2020
ილჰამ ალიევი იაპონურ გაზეთ Nikkei-სთან ინტერვიუში - ომის შემდეგ სომხეთს შეუძლია, აზერბაიჯანისა და თურქეთის პარტნიორი გახდეს
გოჩა თევდორაძე - სიღარიბის და უმუშევრობის დაძლევისთვის ჩვენს მოსახლეობას საოჯახო ბიზნესს შევუქმნით (R)
მერაბ ჭიქაშვილი - "პატრიოტთა ალიანსი" ერთადერთი პარტიაა, რომელსაც კანონის აღსრულება შეუძლია!" (R)
საქართველოში პირველად ჰიბრიდული B2B ფორუმი ჩატარდა