ჯანდაცვის მინისტრის ეკატერინე ტიკარაძის განცხადებით, ამ ეტაპისთვის კლინიკებს აღჭურვილობის 2 კვირის მარაგი აქვს. მინისტრის განმარტებით, სახელმწიფო მუდმივ რეჟიმში მუშაობს მარაგების შევსებაზე.

„რაც შეეხება აღჭურვილობას, ჩვენ ამ ეტაპისთვის გვაქვს 2 კვირის მარაგი, მაგრამ მუდმივ რეჟიმში სახელმწიფო მუშაობს მარაგების შევსებაზე და აქედან გამომდინარე, ის პრიორიტეტი, რომ ექიმები უნდა იყვნენ სრულიად დაცულები, ჩვენ ამას ნაბიჯ-ნაბიჯ მივყვებით. ყოველკვირეულად და ყოველდღიურად გვაქვს ახალი ხელშეკრულებები, ახალი კონტრაქტები და შესაბამისად, მარაგებიც ყოველდღიურაც ივსება,“- განაცხადა ეკატერინე ტიკარაძემ.

ამასთანავე, მინისტრმა კორონავირუსის გამოკვლევისთვის საჭირო ტესტებზე ისაუბრა და აღნიშნა, რომ დღესდღეობით საქართველოში არის ე.წ. ოქროს სტანდარტის ტესტები

„ეს არის PCR ტესტები, რომლიდანაც ერთ-ერთი სახეობა არის სტანდარტული PCR ტესტი, რომლის ტესტირების ხანგრძლივობა არის 4-დან 6 საათამდე, მეორე არის სწრაფი PCR ტესტი, რომელიც პასუხს იძლევა საათნახევარში, ორივე ტესტის ხარისხი არის მაღალი და მათი საიმედოობა არის 98%,“- განაცხადა ეკატერინე ტიკარაძემ.