თბილისის ზღვის ჰოსპიტალში ამ დროისთვის კორონავირუსით ინფიცირების დადასტურებული შემთხვევა არ ფიქსირდება. როგორც თბილისის ზღვის ჰოსპიტლის კრიტიკული მედიცინის დეპარტამენტის ხელმძღვანელმა მარეხ ბექაიამ ჟურნალისტებს განუცხადა, იმ 30 პირიდან, რომელსაც ტესტირება გუშინ ჩაუტარდა, ყველაზე უარყოფითი პასუხი მოვიდა, ხოლო 7 ახალ პაციენტს კვლევას დღეს ჩაუტარებენ.

„კლინიკაში ამჟამად მკურნალობს 52 პაციენტი. გუშინ ლუგარის ლაბორატორიაში 30 პაციენტის კვლევა იქნა გაგზავნილი. მათგან ყველა პასუხი უარყოფითი მოვიდა. აეროპორტიდან შემოსულია 7 პაციენტი, მოგეხსენებათ, ბერლინის რეისი ჩამოვიდა და დღეს გაიგზავნება მათი ანალიზები. პასუხებს მოგვიანებით შეგატყობინებთ. ამ დროისთვის ჩვენს კლინიკაში კორონავირუსის დადასტურებული შემთხვევა არ ფიქსირდება,“ - განაცხადა მარეხ ბექაიამ.