ბოჭორიშვილის სახელობის კლინიკაში ამ დროისთვის 39 პაციენტია მოთავსებული, მათ შორის, კორონავირუსით ინფიცირებული 10 პირია.

როგორც „ინტერპრესნიუსთან“ კლინიკის ექიმმა თამარ ბადურაშვილმა განაცხადა, 2 მათგანს კორონავირუსი დღეს დაუდგინდა.

მისივე თქმით, ლუგარის ცენტრში ამ დროისთვის 21 პაციენტის ანალიზია გაგზავნილი.

„10 დადასტურებული შემთხვევებიდან 2 გახლავთ დღეს დამატებული შემთხვევა, რომლებიც არიან უკვე არსებული პაციენტის ოჯახის წევრები, ახალი კლასტერი არ არის. 10 პაციენტიდან 2 გახლავთ ბავშვი. ჯამში, 18 წლამდე სულ 3 პაციენტი გვყავს. მათი მდგომარეობა სტაბილურია.

არსებული 10 შემთხვევიდან ერთი პაციენტი გვყავს შედარებით მძიმე მიმდინარეობით, რომლის მდგომარეობა არის საყურადღებო, თუმცა, სტაბილური“, - განაცხადა თამარ ბადურაშვილმა.

შეგახსენებთ, ქვეყანაში კორონავირუსით საერთო ჯამში ინფიცირებულია 188 ადამიანი, მათგან 39 გამოჯანმრთელებულია, გარდაცვლილია 2 პაციენტი.