საქართველოს მთავრობის მიერ ჩრდილოატლანტიკური ალიანსისგან სამედიცინო აღჭურვილობისთვის დახმარების თხოვნას "ახალი საქართველოს" თავმჯდომარე გიორგი ვაშაძე ეხმაურება.
მისი თქმით, ყოველთვის, შეიძლება, დასავლელი პარტნიორების, განსაკუთრებით NATO-ს დახმარების იმედი გვქონდეს. ამასთან, ვაშაძის განცხადებით, მისთვის გაურკვეველია, რატომ არ ჰქონდა სახელმწიფოს „სამედიცინო აღჭურვილობასა და საავადმყოფოს ინფრასტრუქტურასთან დაკავშირებით დროულად თადარიგი დაჭერილი“.
"პირველი, ეს მიუთითებს, რამდენად მნიშვნელოვანია NATO-სთან ჩვენი თანამშრომლობა, ყოველთვის შეიძლება გვქონდეს ჩვენი დასავლელი პარტნიორებისა და განსაკუთრებით NATO-ს, როგორც ორგანიზაციის იმედი. მეორე, ვერ ვხვდები, ახლა რატომ ხდება ეს ყველაფერი, თადარიგი არ გვაქვს დაჭერილი, ანუ არ გვაქვს ის, რაც შეიძლება დაგვჭირდეს, ან ველოდებით რამე ისეთს, რაც ჩვენ არ ვიცით. თებერვლის ბოლოს, როცა პირველი შემთხვევა გამოვლინდა, საკმარისზე მეტი დრო გვქონდა, რომ თადარიგი დაგვეჭირა დიაგნოსტიკის შესაძლებლობებთან, სამედიცინო აღჭურვილობასთან, საავადმყოფოს ინფრასტრუქტურასთან დაკავშირებით. ძალიან ცუდია, თუ ამაზე ზრუნვას ახლა ვიწყებთ და ეს პრობლემა ჩვენს წინაშე ახლა დგება. დარწმუნებული ვარ, რომ NATO-ს წევრი ქვეყნები, პარტნიორები, აუცილებლად დაგვეხმარებიან", - აღნიშნავს გიორგი ვაშაძე, რომლის კომენტარსაც "ახალი საქართველოს" საზოგადოებასთან ურთიერთობის სამსახური ავრცელებს.