შინაგან საქმეთა სამინისტრომ თბილისში, ლერმონტოვის ქუჩაზე კედლის ჩამონგრევის შედეგად მუშების დაშავებასთან დაკავშირებით გამოძიება დაიწყო. როგორც “ინტერპრესნიუსს” უწყებაში განუცხადეს, გამოძიება სსკ-ის 240-ე მუხლის 1-ლი ნაწილითაა დაწყებული, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს, რამაც გამოიწვია ჯანმრთელობის ნაკლებად მძიმე ან მძიმე დაზიანება.
ცნობისთვის, თბილისში, ლერმონტოვის ქუჩაზე, ავარიული შენობის დემონტაჟის დროს, ნანგრევებში სამი მუშა მოჰყვა. ისინი კლინიკებში გადაიყვანეს. მათი მდგომარეობა სტაბილურია.