თურქეთის ხელისუფლებამ კორონავირუსით დაინფიცირებულთა შიდაიზოლაციის შემოწმება მობილური კავშირის ოპერატორების მეშვეობით დაიწყო. ამის შესახებ საუბარია ქვეყნის პრეზიდენტის ადმინისტრაციის მიერ გავრცელებულ ინფორმაციაში.

ამ ინფორმაციის თანახმად, სპეციალური პროგრამა თვალს ადევნებს კორონავირუსით დაავადებული პირის ტელეფონის გადაადგილებას. თუკი ის გარეთ გავა, მის ტელეფონზე მივა გაფრთხილება, ასევე განხორციელდება სატელეფონო ზარი, რა დროსაც მას შეახსენებენ, იზოლაციის დაცვის აუცილებლობას. იმ შემთხვევაში, თუ დაინფიცირებული გაფრთხილებას არ დაემორჩილება და თვითიზოლაციის რეჟიმის დარღვევას განაგრძობს, ამის შესახებ ინფორმაცია უსაფრთხოების ორგანოებს გადაეცემა და დამრღვევის მიმართ განხორციელდება აუცილებელი ზომები.