პრემიერ-მინისტრ გიორგი გახარიას განცხადებით, საქართველოსა და ამერიკის მთავრობის ერთობლივი გადაწყვეტილებით, აშშ-ში მყოფი სკოლის 79 მოსწავლე სამშობლოში დაბრუნდება. როგორც პრემიერმა ჟურნალისტებს განუცხადა, რეისი 10 აპრილს, შედგება.
„მინდა, პირველ რიგში, ჩვენ სტრატეგიულ პარტნიორს აშშ-ს ადმინისტრაციას და საქართველოში აშშ-ს საელჩოს მადლობა გადავუხადო, მის სრულ შემადგენლობას, ელჩს კელი დეგნანს. ჩვენ ერთობლივად 10 დღის განმავლობაში ვმუშაობდით და ერთობლივად მივიღეთ გადაწყვეტილება, რომ სკოლის 79 მოსწავლე, რომლებიც დღეს აშშ-ში იმყოფებიან, ჩამოვიყვანოთ. მშობლებმაც ეს სურვილი გამოთქვეს. ხვალ, 10 აპრილს, შედგება რეისი აშშ-დან დოჰაში, ამ რეისის უზრუნველყოფას თავის თავზე ამერიკული მხარე იღებს, ხოლო დოჰადან თბილისში ამ ბავშვების, არასრულწლოვნების, საქართველოში ჩამოყვანას ჩვენი მთავრობა უზრუნველყოფს. ასევე მინდა გითხრათ, რომ ჩვენ სომეხ კოლეგებთან ერთად ვითანამშრომლეთ, მათი მხრიდან იყო თხოვნა და ამ რეისით ჩამოვიყვანთ ასევე სომხეთის 35 მოქალაქეს, ასევე სკოლის მოსწავლეს“, - განაცხადა გახარიამ.
იხილეთ ვიდეო: პრემიერის განცხადებით, აშშ-ში მყოფი 79 მოსწავლე სამშობლოში დაბრუნდება