ბიძინა ივანიშვილის მიერ stopcov ფონდში თანხის ჩარიცხვა უპრეცედენტო ქველმოქმედების მორიგი მაგალითია, - ამის შესახებ პარტია „ქართული ოცნების“ აღმასრულებელმა მდივანმა ირაკლი კობახიძემ განაცხადა, რითაც გამოეხმაურა ამავე პარტიის თავმჯდომარის ბიძინა ივანიშვილის მიერ stopcov ფონდში 100 მილიონი ლარის გადარიცხვას.
კობახიძის თქმით, ეს ის შემთხვევაა, რასაც კომენტარი არ სჭირდება.
„ეს ის შემთხვევაა, რასაც პრაქტიკულად კომენტარიც კი არ სჭირდება. თვითონ ფაქტი არის თავისი კომენტარიც. მხოლოდ იმას აღვნიშნავ, რომ უკვე წლებია ბიძინა ივანიშვილი, მისი ოჯახი, „ფონდი ქართუ“ გამოირჩევა უპრეცედენტო ქველმოქმედებით. ესეც მორიგი მაგალითია ასეთი უპრეცედენტო ქველმოქმედების, რაც ძალიან დაეხმარება სახელმწიფოს იმ პრობლემების დაძლევაში, რომელიც დაკავშირებულია პანდემიასთან,“ - განაცხადა კობახიძემ.
ცნობისთვის, კორონავირუსის წინააღმდეგ საბრძოლველად შექმნილ ფონდში 100-მილიონიანი შემოწირულობა პარტია „ქართული ოცნების“ თავმჯდომარე ბიძინა ივანიშვილმა განახორციელა.
როგორც „ინტერპრესნიუსს“ მთავრობის ადმინისტრაციაში განუცხადეს, ბიძინა ივანიშვილის ოჯახმა Stopcov ფონდისთვის გამოყოფილი თანხა ფონდ „ქართუში“გადარიცხა, „ქართუმ“ კი თავის მხრივ - Stopcov ფონდში.