თურქეთის პრეზიდენტმა, რეჯეფ ტაიფ ერდოღანმა მზადყოფნა გამოთქვა დაეხმაროს სომხეთს კორონავირუსთან ბრძოლაში. „ეხო კავკაზას“ ინფორმაციით, ამის შესახებ თურქეთის ლიდერმა კონტანტინოპოლის სომეხ პატრიარქთან საუბრისას განაცხადა. ერდოღანმა სომხეთს ასევე დახმარება აღუთქვა სომხეთის მოქალაქეების სამშობლოში დაბრუნების საკითხში.

ჯერჯერობით ერევანში საკითხზე კომენტარი არ გაუკეთებიათ.

ამ დროისთვის სომხეთში კორონავირუსი 921 მოქალაქეს დაუდგინდა. გარდაცვლილია 10 პაციენტი.

აღსანიშნავია, რომ წლების განმავლობაში თურქეთსა და სომხეთს შორის დაძაბული ურთიერთობებია. სომხეთი ოსმალეთის იმპერიას სომეხ ხალხთა გენოციდში ადანაშაულებს, რომელსაც მილიონზე მეტი სომეხის სიცოცხლე ემსხვერპლა. დაძაბულობას ზრდის ასევე ანკარას პოზიცია მთიანი ყარაბაღის კონფლიქტში.