ნიუ-იორკში საქართველოს გენერალური საკონსულოს ძალისხმევითა და ორგანიზებით, აშშ-ში გარდაცვლილი საქართველოს მოქალაქე მარიამ კალომლეწავი სამშობლოში დღეს გადმოასვენეს , - აღნიშნულის შესახებ „ინტერპრესნიუსს“ საგარეო საქმეთა სამინისტროდან აცნობეს.
როგორც უწყებაში განმარტავენ, მიუხედავად იმისა, რომ გადმოსვენების ჩვეული პროცედურა აღარ მოქმედებს, საქართველოს მოქალაქის ქვეყანაში ჩამოსვენება მაინც მოხერხდა.
„როგორც ცნობილია, მსოფლიოს მასშტაბით კორონავირუსის გავრცელების გამო შექმნილი ვითარებიდან გამომდინარე, გადმოსვენების ჩვეული პროცედურა აღარ მოქმედებს. ამის მიუხედავად, საქართველოს გენერალური საკონსულოს აქტიური ძალისხმევით მოხერხდა საქართველოს მოქალაქის სამშობლოში გადმოსვენება.
აღსანიშნავია, რომ ამ დროის განმავლობაში, საქართველოს გენერალური საკონსულო მუდმივად იმყოფებოდა კონტაქტზე გარდაცვლილის ოჯახის წევრებთან და უზრუნველყოფდა ოჯახს შესაბამისი საჭიროებებით. მარიამ კალომლეწავს, რომელიც მძიმე სენს ებრძოდა, აშშ-ში 2019 წლის სექტემბრიდან მკურნალობდნენ.
საგარეო საქმეთა სამინისტრო, კიდევ ერთხელ, ღრმა მწუხარებას გამოთქვამს და უსამძიმრებს მარიამ კალომლეწავის ოჯახსა და ახლობლებს“, - აღნიშნულია უწყების მიერ გავრცელებულ ინფორმაციაში.