ჯანდაცვის მინისტრი ეკატერინე ტიკარაძე იმედოვნებს, რომ მოქალაქეები СOVID-19-ის პრევენციის მიზნით შექმნილ აპლიკაციას ბოროტად არ გამოიყენებენ. როგორც მან პრეზენტაციაზე განაცხადა, თუ მოქალაქეები აპლიკაციაში არ შეიყვანენ ოფიციალური ტესტის ნომერს, რითაც ადამიანს კორონავირუსი უდგინდება, ის განგაშის სიგნალს არ გააქტიურებს და სხვა მოქალაქეებთან არ გაგზავნის.

„იმის გათვალისწინებით, რომ საქართველოს გეზი ევროპული მიდგომისკენ აქვს აღებული, ძალიან მნიშვნელოვანია, რომ ჩვენს მოქალაქეებსაც ჰქონდეთ გათვითცნობიერებული მათი მოქალაქეობრივი პასუხისმგებლობა. ჩვენ დეტალურად შევისწავლეთ, თუ რა შესაძლებლობებია საქართველოში სმარტფონების გამოყენების თვალსაზრისით და აღმოჩნდა, რომ მოქალაქეების 40%-ზე მეტს სმარტფონი აქვს. აქედან გამომდინარე, სახელმწიფო სრულად ვართ დამოკიდებული მოქალაქეების კეთილსინდისიერებაზე, მაგრამ გამოწვევის სიმწვავიდან გამომდინარე, ვინაიდან ეს გლობალური პრობლემაა და რეალურად, მოქალაქების თვითშეგნების ბაზაზეა დამყარებული, დარწმუნებული ვარ, ჩვენი მოქალაქეები ყოველივეს სერიოზულად მოეკიდებიან და გაითვალისწინებენ არა მხოლოდ იმ სოციალურ დისტანცირებას, რომელზეც ჩვენ ყოველდღიურ რეჟიმში მივუთითებთ, არამედ საკუთარი ჯანმრთელობის, ასევე იმ მოქალაქეების უსაფთხოებას დაიცავენ, რომლებთანაც ისინი კონტაქტში იმყოფებიან. ასევე, ღრმად მჯერა იმ ფაქტის, რომ ჩვენი მოქალაქეები არ გამოიყენებენ ბოროტად ამ აპლიკაციის შესაძლებლობას, ვინაიდან მას გააჩნია დაცვის მექანიზმი და თუ არ მოხდა ოფიციალური ტესტის ნომრის შეტანა, რითაც ადამიანს კორონავირუსი უდგინდება, შესაბამისად, აპლიკაცია არ ააქტიურებს განგაშის სიგნალს და არ აგზავნის სხვა მოქალაქეებთან, ვისთანაც ისინი კონტაქტში იმყოფებოდენ“,-განაცხადა ტიკარაძემ.