საქართველოს ყოფილი პრეზიდენტი მიხეილ სააკაშვილი მის საპრეზიდენტო ბიბლიოთეკის პირველ სართულზე გაჩენილ ხანძარს სოციალურ ქსელში ეხმაურება და ფაქტის სრულყოფილ გამოძიებას მოითხოვს.

როგორც სააკაშვილი აღნიშნავს, ბოლო პერიოდში ბიბლიოთეკის საქმიანობა ნიღბებისა და სადეზინფექციო საშუალებების დარიგების თვალსაზრისით ძალიან გააქტიურდა, რაც, მისი შეფასებით, ქვეყნის "მფლობელებს" აღიზიანებს.

„დღეს დილით, როდესაც ქუჩაში პრაქტიკულად არავინ არ იყო და ხალხი დღესასწაულს აღნიშნავს, "სააკაშვილის საპრეზიდენტო ბიბლიოთეკის"პირველ სართულზე გაჩნდა ხანძარი და ეს იმ პირობებში, როდესაც დენი ბიბლიოთეკაში გათიშული იყო და სადენები პრინციპში არ უნდა აალებულიყო. "სააკაშვილის საპრეზიდენტო ბიბლიოთეკა" ბოლო ხანებში ძალიან აქტიურია ნიღბების და სადეზინფექციო საშუალებების დარიგების კუთხით და ბევრჯერ მოხვდა ახალ ამბებში და რა თქმა უნდა, აღიზიანებს ქვეყნის "მფლობელებს"! იმედია, ეს ინციდენტი კარგად იქნება გამოძიებული, თუ ახლა არა, ამათი შემოდგომაზე მოშორების შემდეგ აუცილებლად დავადგენთ, რა მოხდა ზუსტად“, - წერს სააკაშვილი სოციალურ ქსელში.

ცნობისთვის, თბილისში, მიხეილ სააკაშვილის საპრეზიდენტო ბიბლიოთეკაში ხანძარი გაჩნდა. როგორც „ინტერპრესნიუსს“ საგანგებო სიტუაციების სამსახურში განუცხადეს, ხანძარი ლოკალიზებულია და შემთხვევის შედეგად არავინ დაშავებულა.

„ცეცხლი 15 კვადრატულ მეტრზე საოფისე ინვენტარს ეკიდა. ადგილზე 4 სახანძრო სამაშველო ბრიგადა მუშაობდა“, - აცხადებენ საგანგებო სიტუაციების სამსახურში.