პაშა ბანკმა და რე|ბანკმა, რომლებიც აზერბაიჯანული საინვესტიციო ჯგუფის „პაშა ჰოლდინგის“ წევრები არიან, მიიღეს ერთობლივი გადაწყვეტილება, რომ 2020 წელს მხოლოდ პანდემიით გამოწვეული მიზეზით არც ერთი თანამშრომელი არ დატოვებს კომპანიას. ამის შესახებ პაშა ბანკის საქართველოს გენერალურმა დირექტორმა, არდა არკუნმა კომპანიის ყველა თანამშრომელს პირადად ვიდეო ზარის საშუალებით აცნობა.

არდა არკუნმა განმარტა, რომ პაშა ჰოლდინგს განვითარების გრძელვადიანი მიზნები აქვს საქართველოს ბაზარზე და პროფესიონალი კადრების დამატებასა და შენარჩუნებაზეა ორიენტირებული.

პაშა ბანკის ინფორმაციით, არდა არკუნმა მადლობა გადაუხადა ყველა ფილიალის თანამშრომელს, ასევე მათ, ვინც დისტანციურად მუშაობს, რათა უწყვეტად შენარჩუნდეს საბანკო პროცესები და კლიენტების მომსახურება.

„შექმნილ ვითარებაში ძალიან მნიშვნელოვანია, სრულყოფილი საბანკო მომსახურება შევთავაზოთ პაშა ბანკის მცირე, საშუალო და მსხვილ ბიზნესებს, ასევე რე|ბანკის საცალო მომხმარებლებს. ხარისხი ყოველთვის იყო ჩვენი ბრენდის ერთი-ერთი მთავარი ღირებულება და მიხარია, რომ მოცემულ კრიზისულ პირობებში ჩვენი გუნდი წარმატებით ართმევს თავს დაკისრებულ მოვალეობებს. ჩვენ კიდევ ერთხელ დავინახეთ, თუ რამდენად მნიშვნელოვანია სწორად შერჩეული, პროფესიონალი თანამშრომლები და გამართული პროცესები ბანკისთვის“ , განაცხადა არდა არკუნმა.

პაშა ბანკის და რე|ბანკის თანამშრომლებს ასევე მიმართა პაშა ჰოლდინგის გენერალურმა დირექტორმა ჯალალ გასიმოვმა.

„იმ მძიმე პერიოდში, რომელიც ახლა ჩვენს ქვეყნებშია, მოგმართავთ თხოვნით, რომ თითოეული ჩვენგანი პასუხისმგებლობით მოვეკიდოთ ჩვენს სამსახურს, დავიცვათ მთავრობის რეკომენდაციები, სოციალური დისტანცია და დავრჩეთ სახლში, რათა ხელი შევუწყოთ მეტი სიცოცხლის შენარჩუნებას. გვახსოვდეს, რომ ეკონომიკური განვითარების იგივე ეტაპზე დაბრუნება კრიზისის შემდეგ შესაძლებელი იქნება, დაკარგული სიცოცხლეების დაბრუნება კი - შეუძლებელი. ჩვენ პაშა ჰოლდინგის ერთი დიდი ოჯახი ვართ და ერთად ვეცდებით შევუნარჩუნოთ ეკონომიკური სტაბილურობა ჩვენს თანამშრომლებს ყველა იმ ქვეყანაში, სადაც ვოპერირებთ. ჩვენ პირობა დავდეთ, რომ 2020 წელს პაშა ჰოლდინგის შვილობილი კომპანიებიდან არც ერთი თანამშრომელი არ დატოვებს სამსახურს და უწყვეტად მიიღებს სრულ ანაზღაურებას“, - განაცხადა პაშა ჰოლდინგის გენერალურმა დირექტორმა.