გარკვეული კომპენსაცია, რაც ახდენდა ამ მასობრივი ტესტირების არგაკეთებას, ეს იყო ის, რომ ტესტირება მართალია შედარებით მცირე რაოდენობით, მაგრამ უკეთდებოდა იმ პირებს, ვისაც ეს ყველაზე მეტად სჭირდებოდა, - ამის შესახებ თბილისის ინფექციური საავადმყოფოს გენერალურმა დირექტორმა, თენგიზ ცერცვაძემ განაცხადა.

მისი თქმით, კორონავირუსის გავრცელების თვალსაზრისით საქართველოს კარგი მდგომარეობა განპირობებულია იმით, რომ შეზღუდული რესურსი, თუნდაც ტესტების მცირე რაოდენობა „მაქსიმალური სარგებლით” გამოიყენებოდა.

„გარკვეული კომპენსაცია, რაც ახდენდა ამ მასობრივი ტესტირების არგაკეთებას, ეს იყო ის, რომ ტესტირება მართალია შედარებით მცირე რაოდენობით, მაგრამ უკეთდებოდა იმ პირებს, ვისაც ეს ყველაზე მეტად სჭირდებოდა. მხედველობაში მაქვს პაციენტები, რომლებსაც სიმპტომები ან ჰქონდათ რაიმე რისკფაქტორი, მაგალითად კონტაქტი ინფიცირებულთან, უცხოელთან ან სხვასთან და ამას გვიჩვენებს ბოლნისის, მარნეულის, ლენტეხის, ქობულეთის მაგალითები, რომ მართალია ქვეყანაში ვერ ტარდება მასობრივად, მაგრამ იმ რეგიონში, საიდანაც სიგნალი მოვიდა, რომ ვიღაც გახდა ავად და შესაძლებელია დაწყებულიყო უკონტროლო გავრცელება, იქ მაშინვე მოხდა მასობრივი ტესტირება. მარნეულ-ბოლნისში მასობრივი ტესტირება მოხდა და სწორედ ამ მასობრივი ტესტირებით მოხდა ახალი შემთხვევების გამოვლენა.

ის, რომ საქართველოში კარგი მდგომარეობაა და მთელი მსოფლიო აღიარებს ამას, მაინც განპირობებულია იმით, რომ ის შეზღუდული რესურსი, თუნდაც ტესტების მცირე რაოდენობა გამოიყენებოდა მაქსიმალური სარგებლით”, - განაცხადა ცერცვაძემ.