ქართულ - ჰოლანდიურ ჰოსპიტალში აცხადებენ, რომ კლინიკაში კარანტინი დასრულდა და კორონავირუსი არც ერთ თანამშრომელს არ დაუდასტურდა. ინფორმაციას ამის შესახებ კლინიკა სოციალურ ქსელში ავრცელებს.

მათივე ინფორმაციით, ჩატარდა სადეზინფექციო სამუშაოები და ჰოსპიტალი ჩვეულ რეჟიმში აგრძელებს საქმიანობას

"მოგახსენებთ, რომ ქართულ - ჰოლანდიურ ჰოსპიტალში დასრულდა კარანტინი! გენერალური სადეზინფექციო სამუშაოები ჩატარებულია, განმეორებითი ტესტირებითაც ყველა თანამშრომელი კოვიდუარყოფითია!

ეს კიდევ ერთხელ მოწმობს, რომ კლინიკაში ინფექციის კონტროლის ყველა ზომა ყველა დონეზე დაცულია და სამედიცინო მომსახურებისთვის უსაფრთხო გარემოა როგორც პაციენტების, ისე სამედიცინო პერსონალისათვის!

ქართულ - ჰოლანდიური ჰოსპიტალი ჩვეული ერთგულებით და შემართებით აგრძელებს საქმიანობას - თქვენთვის!!!"-ნათქვამია კლინიკის მიერ გავრცელებულ ინფორმაციაში.

ცნობისთვის, რამდენიმე კვირის წინ, პაციენტს, რომელიც კლინიკაში მკურნალობდა კორონავირუსი დაუდასტურდა, რის გამოც კლინიკამ საქმიანობა დროებით შეაჩერა.