ხელისუფლებასთან სხვადასხვა კორუფციული ინტერესებით გადაჯაჭვული კონკრეტული პიროვნებები სარგებლობენ ყველანაირი პრივილეგიით, რომელიც მათ არ ეკუთვნით,- ამის შესახებ „ევროპული საქართველოს“ ერთ-ერთი წევრმა ირაკლი აბესაძემ განაცხადა.

როგორც აბესაძე განმარტავს, „ქართული ოცნების“ ხელისუფლებისთვის უმძიმესი კრიზისის დროსაც კი ზრუნვის საგნად რჩება არა საზოგადოების ინტერესები, არამედ „ხელისუფლების ფავოროტი ადამიანების კეთილდღეობა“.

„ვხედავთ, რომ ხელისუფლება დუმს, თუ როგორ აღმოაჩნდა ოთარ ფარცხალაძეს სპეციალური საშვი, რაც ძალიან ნათელი და ცალსახა დადასტურებაა, რომ ნეპოტიზმის, ფავორიტიზმის და კორუფციის პირობებში, „ ქართული ოცნების“ ხელისუფლებისთვის ამ უმძიმესი კრიზისის დროსაც კი, ზრუნვის საგნად რჩება არა საზოგადოების ინტერესები, არამედ ხელისუფლების ფავორიტი ადამიანების კეთილდღეობა. ეს არის იმ დანარჩენი საზოგადოების აბუჩად აგდება, რომელიც ხელისუფლებამ უბრალოდ გამოკეტა სახლში უმანქანოდ. მათი დიდი ნაწილი ამის გამო დატოვა შემოსავლის გარეშე და თითოეულ მათგანს მნიშვნელოვნად გაურთულა ცხოვრება. ამის პარალელურად, ჩვენ ვხედავთ, რომ ხელისუფლებასთან სხვადასხვა კორუფციული ინტერესებით გადაჯაჭვული კონკრეტული პიროვნებები სარგებლობენ ყველანაირი პრივილეგიით, რომელიც მათ არ ეკუთვნით“, - განაცხადა ირაკლი აბესაძემ.