ყინწვისის მამათა მონასტრის წინამძღვარი, დავით (კობა) კობაიძე, რომელიც სასულიერო პირის განზრახ მკვლელობის მცდელობის ფაქტზეა დაკავებული, დუმილის უფლებას იყენებს, - აღნიშნულის შესახებ „ინტერპრესნიუსს“ დაკავებულის ადვოკატმა ალექსანდრე კობაიძემ განუცხადა.

როგორც უფლებადამცველი განმარტავს, ცეცხლსასროლი იარაღი, საიდან გასროლასაც სასულიერო პირს საგამოძიებო უწყება ედავება, საქმეში არ არსებობს.

„ამ ეტაპზე ის დუმილის უფლებას იყენებს, ანუ ბრალს არ აღიარებს. საქმის გარემოებებთან დაკავშირებით, ერთადერთი რამის თქმა შემიძლია - საქმეში იარაღი არ არსებობს. საქმის მასალების გაცნობის შემდეგ შემეძლება უფრო მეტი ინფორმაცია მოგაწოდოთ როგორც თქვენ, ასევე საზოგადოებას. დიდი ალბათობით, ბრალს ხვალ წაუყენებენ“, - განაცხადა კობაიძემ.

გამოძიების ინფორმაციით, რამდენიმე დღის წინ, დაკავებულმა დავით კობაიძემ გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

სასულიერო პირი განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ბრალდებით დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს. მომხდართან დაკავშირებით გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს.