თუ მკვლელობის მცდელობის საქმეზე დაკავებულ სასულიერო პირს ბრალეულობა დაუმტკიცდება, საეკლესიო სამართლით გათვალისწინებული ზომები უნდა მიიღოს მმართველმა მღვდელმთავარმა, ან სინოდმა.
ამის შესახებ „ინტეპრესნიუსს“ საპატრიარქოში განუცხადეს.
„რამდენიმე დღის წინ ეპარქიამ არ დაადასტურა ინფორმაცია ინციდენტის შესახებ, თუმცა ვრცელდებოდა საპირისპირო ინფორმაციაც. როგორც უკვე ცნობილია სამართალდამცველმა უწყებამ დააკავა სასულიერო პირი, მძიმე ბრალდებით. ჯერ გაურკვეველია ბრალი დაუმტკიცდება თუ არა. ზოგადად მსგავსი ქმედება შეუთავსებელი იქნებოდა სასულიერო პირობასთან. ასეთ შემთხვევაში საეკლესიო სამართლით გათვალისწინებული ზომები უნდა მიიღოს მმართველმა მღვდელმთავარმა, ან სინოდმა.
საპატრიარქო ამ საკითხზე ვერ იმსჯელებს“ , - აცხადებენ საპატრიარქოში.
ცნობისათვის, გორის რაიონულმა სასამართლომ ყინწვისის მამათა მონასტრის წინამძღვარს, დავით (კობა) კობაიძეს პატიმრობა შეუფარდა.