ჯანდაცვის მსოფლიო ორგანიზაცია იმედს გამოთქვამს, რომ ჩინეთი ორგანიზაციას მიიწვევს კორონავირუსის წარმოშობის შესახებ განხორციელებულ გამოძიებებში.
„ჯანდაცვის მსოფლიო ორგანიზაცია სურვილს გამოთქვამს საერთაშორისო პარტინორებთან ერთად მიწვეულ იქნას ჩინეთის მთავრობის მიერ, რათა მონაწილეობა მიიღოს გამოძიებაში კორონავირუსის ცხოველური წარმომავლობის შესახებ“,-განაცხადა ორგანიზაციის პრესსპიკერმა ტარიკ ჟასარევიჩმა „ფრანს პრესის“ შეკითხვის საპასუხოდ.
კორონავირუსი სახელწოდებით COVID-19 თავდაპირველად ჩინეთში, ქალაქ უხანში დაფიქსირდა. მას შემდეგ მსოფლიოს მასშტაბით სამ მილიონ ადამიანზე მეტი ვირუსით დაინფიცირდა. ჩინეთი მსოფლიო მედიამ არაერთხელ დაადანაშაულა, რომ ვირუსი უხანის ლაბორატორიიდან გავრცელდა. ამერიკის პრეზიდენტმა, დონალდ ტრამპმა დღეს აღნიშნა, რომ მას ამის დამადასტურებელი მტკიცებულებები ნანახი აქვს, თუმცა ვერ გაასაჯაროებს.