თბილისის ზღვის ჰოსპიტალის კრიტიკული მედიცინის დეპარტამენტის ხელმძღვანელის მარეხი ბექაიას თქმით, კორონავირუსზე შემოწმებული 18 კვლევიდან ყველა უარყოფითია. როგორც მან ჟურნალისტებს განუცხადა, კლინიკაში მძიმე მდგომარეობაში მყოფ ერთ პაციენტს კორონავირუსი არ დაუდასტურდა.
„კლინიკაში ამ დროისთვის 30 პაციენტი იმყოფება. 18 კვლევა იყო გაგზავნილი და ყველა უარყოფითი პასუხია მიღებული. კლინიკაში ერთი მძიმე პაციენტი რჩება, რომელთანაც COVID-19 არ დადასტურდა. პაციენტს პროფილურ, სომატურ კლინიკაში გადაიყვანენ. მომართვიანობამაც მოიკლო, კარგა ხანია, კლინიკაში COVID-19-ის ფაქტი არ დადასტურებულა“,- განაცხადა ბექაიამ.
ცნობისთვის, საქართველოში კორონავირუსით ინფიცირების შემთხვევათა რაოდენობა 604 ადამიანს შეადგენს, მათგან 240 გამოჯანმრთელებულია, ხოლო 9 გარდაიცვალა. ამასთან, უცხოეთიდან სამკურნალოდ გადმოყვანილია საქართველოს 3 მოქალაქე.