მოსკოვში, მიმდინარე წლის აპრილში გარდაცვალებათა რაოდენობა წინა წლებთან შედარებით 20%-ით გაიზარდა. ინფორმაციას მოსკოვის საჯარო რეესტრის სააგნეტოზე დაყრდნობით, The Moscow Times აქვეყნებს.
ოფიციალური მონაცემებით, გასულ თვეს რუსეთის დედაქალაქში საერთო ჯამში 11846 ადამიანი გარდაიცვალა, როცა ბოლო 10 წლის ამავე თვის საშუალო მაჩვენებელი 9866 იყო. მედიის ინფორმაციით, ექსპერტები მიიჩნევენ, რომ აღნიშნული მონაცემები კორონავირუსის ინფექციასთან არის დაკავშირებული და რუსეთის მთავრობა რეალურ ინფორმაციას მალავს.
ცნობისთვის, ოფიციალური მონაცემებით, კორონავირუსით გარდაცვლილთა რაოდენობა ქვეყანაში ინფიცირებულთა 1%-საც არ შეადგენს, რაც აშშ-სა და ევროპის ქვეყნების მაჩვენებლებზე მნიშვნელოვნად ნაკლებია. შედარებისთვის, აშშ-ში გამოვლენილ კორონავირუსით ინფიცირებულთა დაახლოებით 5,9% გარდაიცვალა, როცა რუსეთში აღნიშნული მაჩვენებელი 0,9%-ს არ აღემატება.