უდანაშაულო ადამიანებზე განხორციელებული ნებისმიერი თავდასხმა მიუტევებელია, თუმცა ჩვილებსა და ქალებზე თავდასხმა სრული ბოროტებაა, - ამის შესახებ აშშ-ის სახელმწიფო მდივანმა მაიკ პომპეომ ქაბულის სამშობიარო საავადმყოფოზე განხორციელებული თავდასხმის კომენტირებისას განაცხადა.
გარდა ამისა, მაიკ პომპეომ ავღანეთში, ნანგარჰარის პროვინციაში, დაკრძალვის ცერემონიის დროს მომხდარი აფეთქებაც დაგმო, რის შედეგადაც დაიღუპა სულ მცირე 26 და დაშავდა 68 ადამიანი.
„ტერორისტები, რომლებიც დაკრძალვის ცერემონიალში მონაწილე ადამიანებს ესხმიან თავს, მიზნად ისახავენ, დაარღვიონ კავშირები, რაც ოჯახებსა და საზოგადოებებს აკავშირებენ, მაგრამ ისინი წარმატებას ვერასდროს მიაღწევენ,“- განაცხადა მაიკ პომპეომ.
შეახსენებთ, გუშინ სამი შეიარაღებული პირი ქაბულში მდებარე სამშობიარო საავადყოფოს დაესხა თავს, რის შედეგადაც 14 ადამიანი, მათ შორის 2 ახალშობილი, დაიღუპა, 15 კი -დაიჭრა.
გუშინ ავღანეთში კიდევ ერთი მასშტაბური თავდასხმა განხორციელდა. ხელნაკეთი ბომბი ნანგარჰარის პროვინციაში მაშინ ამოქმედდა, როცა რამდენიმე ათეული ადამიანი ადგილობრივი პოლიციის მეთაურის დაკრძალვაზე დასასწრებად იყო შეკრებილი. დაიღუპა სულ მცირე 26 და დაშავდა 68 ადამიანი. აღნიშნულ თავდასხმაზე პასუხისმგებლობა დაჯგუფება „ისლამურმა სახელმწიფომ“ აიღო. რაც შეეხება საავადმყოფოზე თავდასხმას, ჯერჯერობით უცნობია, თუ რომელი დაჯგუფება დგას მის უკან. თალიბანის წარმომადგენელმა, ზაბიჰულაჰ მუჯაჰიდმა გაავრცელა განცხადება, რომელშიც ქაბულის სამშობიაროზე თავდასხმაში მონაწილეობა უარყო.