პოლიტპატიმრების არგამოშვების შემთხვევაში, საარჩევნო სისტემის მორიგ ჯერზე ვერშეცვლაზე სრული პასუხისმგებლობა პირადად ივანიშვილსა და მის გუნდს დაეკისრება, - ამის შესახებ ოპოზიციური პარტიების მიერ მიღებულ ერთიან განცხადებაშია ნათქვამი.
განცხადებაში ასევე აღნიშნულია, რომ პოლიტპატიმრების არგამოშვება ნიშნავს, ივანიშვილის მიერ 8 მარტის შეთანხმების მთლიანად ჩაშლას.
ამასთან ოპოზიცია აცხადებს, რომ ის ოპოზიციური ფრაქციები, რომლებიც ბოიკოტის რეჟიმში იყვნენ, გააგრძელებენ საპარლამენტო ბოიკოტს.
„ივანიშვილის მიერ ამ შეთანხმების არშესრულების შემთხვევაში, დაზიანდება საქართველო. იმ დროს როცა განსაკუთრებით მნიშვნელოვანია მეგობრებისგან ეკონომიკური და უსაფრთხოების სფეროში დახმარების მიღება. ამ ყველაფერზე პასუხისმგებელი იქნება ივანიშვილი. ამ პირობის დარღვევა მას 2020 წლის საპარლამენტო არჩევნებზე მარცხისგან ვერ იხსნის.
ჩვენი ამოცანაა, რომ ეს შეთანხმება შედგეს. ჩვენი ამოცანაა, რომ ყველა ცვლილება საქართველოში, მხოლოდ მხოლოდ კონსტიტუციურ ფარგლებში და მშვიდობიანად განხორციელდეს, რათა საქართველო დემოკრატიული განვითარების თვისობრივად ახალ ეტაპზე გადავიდეს და ხელისუფლება არჩევნების გზით მეორედ შეცვალოს , - ნათქვამია ოპოზიციის ერთიან განცხადებაში.