ესპანეთის დეპუტატთა კონგრესის თავმჯდომარე მერიჩელ ბატეტი საქართველოს პარლამენტის თავმჯდომარესთან ვიდეკონფერენციის ფორმატში შეხვედრას სოციალურ ქსელ "ტვიტერის" საშუალებით ეხმაურება.
მერიჩელ ბატეტი თავის "ტვიტში", წერს, რომ მან არჩილ თალაკვაძეს ესპანეთის მიმართ ინტერესისთვის მადლობა გადაუხადა.
"დღეს საშუალება მქონდა მესაუბრა საქართველოს პარლამენტის თავმჯდომარესთან, არჩილ თალაკვაძესთან, რომელსაც მადლობა გადავუხადე ესპანეთის მიმართ, ამ რთულ პერიოდში გამოხატული ინტერესის გამო და ესპანელი ხალხის მიმართ მისი სიყვარულისა და თანაგრძნობისთვის" - წერს ბატეტი.
ცნობისთვის, დღეს საქართველოს პარლამენტის თავმჯდომარე ესპანელ კოლეგას ვიდეოკონფერენციის ფორმატში ესაუბრა. ამის შესახებ ინფორმაცია პარლამენტის თავმჯდომარის ოფიციალურ "ფეისბუქ" გვერდზე გავრცელდა.
"საინტერესო და ხანგრძლივი საუბარი მქონდა ჩემს ესპანელ კოლეგასთან, ესპანეთის დეპუტატთა კონგრესის თავმჯდომარე მერიჩელ ბატეტ ლამანიასთან. ვიდეოკონფერენციის ფორმატში COVID19-თან დაკავშირებულ ღონისძიებებზე, სოციალურ და ეკონომიკურ პროგრამებზე ვისაუბრეთ.
განვიხილეთ საგანგებო მდგომარეობის პერიოდში და შემდგომ, საპარლამენტო საქმიანობის ძირითადი პრიორიტეტები.
ესპანეთის პარლამენტის თავმჯდომარეს ჩვენი სოლიდარობა და მხარდაჭერა გადავეცი. იმედი მაქვს, რომ ესპანეთი კოვიდ19-ის ეპიდემიას მალე დაამარცხებს და მშვიდი, კარგი დღეები დაბრუნდება" , - დაწერა პარლამენტის თავმჯდომარემ, არჩილ თალაკვაძემ "ფეისბუქის" ოფიციალურ გვერდზე.