პოლიტიკური გაერთიანება "ლელო საქართველოსთვის" ლიდერები მამუკა ხაზარაძე, ბადრი ჯაფარიძე და გრიგოლ გეგელია ევროპარლამენტარებს ანდრიუს კუბილიუსსა და რასა იუკნევიჩიენეს ონლაინ ფორმატში ესაუბრნენ.

როგორც „ინტერპრესნიუსს“ პარტიიდან „ლელო საქართველოსთვის“ აცნობეს, საუბარი შეეხო ქართული დემოკრატიის კრიზისს და "ქართული ოცნების" მიერ სახელმწიფოს მიტაცების მცდელობას. მათივე ინფორმაციით, ევროპარლამენტარებმა კიდევ ერთხელ დააფიქსირეს თავისი გულმხურვალე მხარდაჭერა საქართველოს ხალხისა და პრო-დასავლური პოლიტიკური ძალების მიმართ. პარტიის ცნობით, აღინიშნა, რომ 8 მარტის შეთანხმების სრულყოფილ შესრულებას და საარჩევნო პროცესის დემოკრატიულად წარმართვას ალტერნატივა არ გააჩნია.

"ლელოს" ლიდერებმა და ევროპარლამენტარებმა აგრეთვე ისაუბრეს "ლელოს" პოზიტიურ დღის წესრიგზე, დემოკრატიის განახლებასა და პოლიტიკური და ეკონომიკური განვითარების მოდელებზე.