ძალიან მნიშვნელოვანია, რომ ეს ოპოზიციური ფორმატი რჩება იგივე, ერთიანი საკუთარ პოზიციებში, ისეთივე მტკიცე, როგორიც იყო აქამდე. ძალიან მნიშვნელოვანია, რომ ბოლომდე შესრულდეს შეთანხმების ის ნაწილი, რომელიც ეხება პოლიტპატიმრებს და გათავისუფლდეს გიორგი რურუა, - ამის შესახებ ოპოზიციური პარტიების ლიდერების შეხვედრის დასრულების შემდეგ "ნაციონალური მოძრაობის" ერთ-ერთმა ლიდერმა თინა ბოკუჩავამ განაცხადა.

მისივე თქმით, ერთიანობის დამსახურებაა, რომ 8 მარტის შეთანხმების გარკვეული ნაწილი შესრულებულია.

"ეს აისახება იმაში, რომ გიგი უგულავა და ირაკლი ოქრუაშვილი თავად ესწრებოდნენ ამ შეხვედრას. ძალიან მნიშვნელოვანია, რომ ბოლომდე შესრულდეს შეთანხმების ის ნაწილი, რომელიც ეხება პოლიტპატიმრებს და გათავისუფლდეს გიორგი რურუა. ამისთვის ბევრი სხვადასხვა გზა არსებობს, რომელსაც შეუძლია ხელისუფლებამ მიმართოს. ამის შემდეგ ჩვენ შევძლებთ, რომ მხარი დავუჭიროთ საკონსიტუტციო ცვლილებებს, რომელიც გადაიყვანს ქვეყანას უფრო პროპორციულ საარჩევნო მოდელზე და მოგვცემს უფრო წარმომადგენლობითი პარლამენტის არჩევის შესაძლებლობას. ახლა მხოლოდ და მხოლოდ გიორგი რურუას გათავისუფლება რჩება დაბრკოლებად, იმაში რომ ეს 8 მარტის შეთანხმების კომპონენტი ჩავთვალოთ შესრულებულად და გადავიდეთ მეორე კომპონენტის შესრულებაზე, რომელიც საკონსიტუციო ცვლილებებს ეხება. კონსენსუსზე დამყარებული კონსტიტუციის მიღება არის ის დაკვეთა, რაც აქვს ქართველ ხალხს," - განაცხადა ბოკუჩავამ.

რაც შეეხება 20 ივნისის აქციას, თინა ბოკუჩავას განცხადებით, ეს გაიმართება, იმ დროს არსებული ეპიდემიოლოგების რეკომენდაციების შესაბამისად. ამასთან, ბოკუჩავას თქმით, საერთო მაჟორიტარებზე საუბარი არ ყოფილა, რადგან ჯერჯერობით, გაურკვეველია რამდენი სამაჟორიტარო ოლქი იქნება 30 თუ 73.