18 მაისს, ეროვნული სამოსის დღესთან დაკავშირებით, შოთა რუსთაველის საქართველოს ეროვნული სამეცნიერო ფონდის ორგანიზებით, ფონდის გრანტიორებისთვის, პედაგოგებისთვის ისტორიულ მეცნიერებათა დოქტორის, ხელოვნების სასახლის გენერალური დირექტორის, გიორგი კალანდიას ლექცია თემაზე, „ქართველ მეფეთა და დედოფალთა ეროვნული სამოსი“ გაიმართა. ამის შესახებ ინფორმაციას რუსთაველის სამეცნიერო ფონდი ავრცელებს.

მათივე ინფორმაციით, დისტანციურ შეხვედრას ესწრებოდნენ ფონდის გენერალური დირექტორი ზვიად გაბისონა და მოადგილე ჯაბა სამუშია.

„ლექციაზე გიორგი კალანდიამ ქართველ მეფეთა სამოსის ისტორია განიხილა, თუ რა გავლენას ახდენდა პოლიტიკური სიტუაცია ხელმწიფეების ჩაცმულობაზე, რას გვიყვება ტანსაცმელი და რა სიმბოლური დატვირთვა ჰქონდა მას. ფონდის გენერალურმა დირექტორმა აღნიშნა, რომ ქართველი დიდებულები სამოსის სილამაზესთან ერთად სიმდიდრეს წარმოაჩენდნენ, რაც სამეფოს პრესტიჟულობას უსვამდა ხაზს და ასევე, აღნიშნა ისიც, რომ ქართული ისტორიული სამოსი შეგვიძლია იმ ხელოვნების ძეგლად ჩავთვალოთ, რომლის ფასი იშვიათად აქვს მსოფლიოს.

ამასთანავე, დასასრულს ფონდის გენერალურმა დირექტორმა, ზვიად გაბისონიამ გიორგი კალანდიას საინტერესო ლექციისთვის მადლობა გადაუხადა. დისტანციური შეხვედრა კითხვა-პასუხის რეჟიმით დასრულდა“ , - ნათქვამია ფონდის მიერ გავრცელებულ ინფორმაციაში.