საქართველოს საკონსტიტუციო სასამართლო საქართველოს მთავრობის წინააღმდეგ „გირჩის“ სარჩელს განიხილავს.
მოსარჩელე მხარე ე.წ კომენდანტის საათს ასაჩივრებს, რადგან მიაჩნიათ, რომ დაწესებული შეზღუდვები მიმოსვლასთან დაკავშირებით კონსტიტუციას არღვევს.
მათივე თქმით, „კომენდანტის საათის“ დროს დაწესებული შეზღუდვები მოქალაქეებს უფრო მეტ ზიანს აყენებს, ვიდრე პანდემია.
„ადამიანები პატიმრებივით გამოკეტეს სახლებში. მათ ისე ვექცევით, როგორც მთავრობას გაუხარდება, რაც არაა სამართლიანი და არც იმ მიზანს ემსახურება, რაც თავად დაასახელეს. გადაადგილების თავისუფლების სპეციფიკიდან გამომდინარე, ეს მხოლოდ გადაადგილების თავისუფლებას არ ეხება, რადგან ამაზე არის ბევრი სხვა უფლება დაკავშირებული. მაგალითად, ის ფიზიკურად ვერ იმუშავებს, არც შემოსავლოს წყარო ექნება და ის შეიძლება დარჩეს საკვების გარეშე და ფატალურ შედეგი შეიძლება მიიღოს. ეს არ არის დავა მხოლოდ „კომენდატის საათის“ შესახებ, დავაა იმაზე, რის უფლებას ვაძლევთ სახელმწიფოს და რა მასშტაბით შეიძლება ჩაერიოს ჩვენს თავისუფლებაში“, - განაცხადა „გირჩის“ წარმომადგენელმა ლევან ჯგერენაიამ.
მოპასუხე მხარეს მიაჩნია, რომ „კომენდანტიის საათის“ დროს დაწესებული შეზღუდვები კონსტიტუციასთან მიმართებაში მართებულია.
„მთავრობა მიიჩნევს, რომ გასაჩივრებული აქტი სრულ შესაბამისობაშია კონსტიტუციასთან. ამ შემთხვევაში საუბარია ღამის საათებში გადაადგილების შეზღუდვაზე, შესაბამისად, სამუშაო დროსთან კავშირში არ არის. გარდა ამისა მნიშვნელოვანია ისიც, რომ ყველა აუცილებელი საჭიროება, რომელიც ამ პერიოდში შეიძლება წარმოშობილიყო, იყო დადებითად გადაწყვეტილი. იყო ინდივიდუალური მიდგომები“, - განაცხადა ქეთევან კრაწაშვილმა.