„ჯორჯიან მანგანეზის“ ინიციატივითა და დაფინანსებით, ჭიათურაში, ი.ჭავჭავაძის ქუჩაზე, ცენტრალური წამყვანი ფაბრიკის მიმდებარე ტერიტორიაზე ღია საკალათბურთო მოედნისა და სარეკრეაციო სივრცის მოწყობის სამუშაოები მიმდინარეობს.
როგორც „ინტერპრესნისს“ „ჯორჯიან მანგანეზიდან“ აცნობეს, ამ ეტაპზე, საკალათბურთო მოედნის შემოღობვითი სამუშაოები უკვე დასრულებულია, ასევე მოსწორებულია ტერიტორია და სპეციალური საფარის დაგება იგეგმება.
„ჯორჯიან მანგანეზისთვის“ ჯანსაღი ცხოვრების წესის ხელშეწყობა უმნიშვნელოვანესია, ასევე, მნიშვნელოვანია, რომ ჭიათურელი ახალგაზრდები საინტერესო აქტივობებით დაკავდნენ, მათ შორის, რა თქმა უნდა, მნიშვნელოვანია მათი სპორტულ აქტივობებში ჩართვა. მოსახლეობასთან შეხვედრის შემდგომ გადაწყვეტილება მივიღეთ, რომ ჭავჭავაძის ქუჩაზე ახალგაზრდებისთვის საკალათბურთო მოედანი და სარეკრეაციო სივრცე მოგვეწყო. იმედი მაქვს, რომ პროექტის დასრულების შემდეგ, ეს ტერიტორია მათთვის საყვარელი თავშეყრის ადგილი იქნება“, – განაცხადა „ჯორჯიან მანგანეზის“ სპეციალურმა მმართველმა, ნიკოლოზ ჩიქოვანმა.
„ჯორჯიან მანგანეზის“ ცნობით, ჭავჭავაძის ქუჩაზე ახალი სტადიონის მშენებლობის გარდა, „ჯორჯიან მანგანეზმა“ ჭიათურის სოფლებში, დარკვეთსა და პერევისაში ძველი სტადიონების სარეაბილიტაციო სამუშაოები დაიწყო, ასევე, პერევისაში არსებულ სტადიონზე კალათბურთის ფარების მონტაჟი და საგულშემატკივრო სივრცის განახლება იგეგმება.