ძალიან ნათელი გზავნილი მიიღო ხელისუფლებამ, ამიტომ ჩვენ იმედს ვიტოვებთ, რომ საღი აზრი ეყოფათ და შეთანხმების მეორე ნაწილიც იქნება ბოლომდე მიყვანილი, - ამის შესახებ „ევროპული საქართველოს“ წევრმა სერგი კაპანაძემ ჟურნალისტებთან 8 მარტის შეთანხმებასთან დაკავშირებით განაცხადა.

მისივე თქმით, ოპოზიცია შეთანხმების სრულად შესრულების შემდეგ საკონსტიტუციო ცვლილებებს მხარს დაუჭერს.

„8 მარტის შეთანხმება შესრულებულად ჩაითვლება მარტო იმ შემთხვევაში, თუ მისი ყველა ნაწილი სრულად იქნება შესრულებული. ჯერჯერობით პოლიტიკური პატიმრების გათავისუფლების ნაწილი სრულად შესრულებული არ არის და ჩვენი მოლოდინია, რომ სრულად შესრულდება, ამაზე სხვათაშორის ძალიან კარგი, სწორი გადაწყვეტილებები გაკეთდა ჩვენი პარტნიორების მხრიდან და ძალიან ნათელი გზავნილი მიიღო ხელისუფლებამ. ამიტომ, ჩვენ იმედს ვიტოვებთ, რომ საღი აზრი ეყოფათ და ეს ნაწილიც იქნება ბოლომდე მიყვანილი, ისევე როგორც ეს მოხდა გიგი უგულავას და ირაკლი ოქრუაშვილის შემთხვევაში. ამის მერე ჩვენ უკვე მხარს დავუჭერთ საკონსტიტუციო ცვლილებებს და შეიძლება, რომ შედარებით ნორმალური წინასაარჩევნო გარემო გვქონდეს, ეს არის ყველას ინტერესი,"- განაცხადა სერგი კაპანაძემ.