კინზინგერის ეს განაცხადი დიპლომატიურ და პოლიტიკურ ენაზე ნიშნავს იმას, რომ არანაირი ნდობა არ არსებობს საარჩევნო სისტემის მიმართ,- ამის შესახებ "ნაციონალური მოძრაობის " წევრმა სალომე სამადაშვილმა განაცხადა, რითაც ის ამერიკელი კონგრესმენის ადამ კინზინგერის განცხადებას გამოეხმაურა. მისი თქმით, საერთაშორისო პარტნიორები ბიძინა ივანიშვილზე ზეწოლის საჭიროებას ხედავენ.
“კინზინგერისგან იყო მოწოდება, რომ არჩევნები უნდა იყოს სამართლიანი. ის იმედოვნებს, რომ ექნება შესაძლებლობა, პირადად ჩამოვიდეს საქართველოში და მიიღოს მონაწილეობა სადამკვირვებლო საქმიანობაში ამ არჩევნებზე. ეს დიპლომატიურ და პოლიტიკურ ენაზე არის განაცხადი, რომ არანაირი ნდობა არ არსებობს საარჩევნო სისტემის მიმართ და დღეს ჩვენს მეგობრებს და პარტნიორებს მიაჩნიათ, რომ უზარმაზარი პოლიტიკური წნეხი არის განსახორციელებელი ბიძინა ივანიშვილზე, იმისთვის, რომ საქართველოში აღდგეს დემორატიული არჩევანის შესაძლებლობა ", - განაცხადა სამადაშვილმა.
შეგახსენებთ, ამერიკელი კონგრესმენი ადამ კინზინგერი აცხადებს, რომ შექებას იმსახურებს საქართველოს მთავრობა და ოპოზიცია, რომლებმაც რთულ დროში გამოსავლის პოვნა სცადეს. თუმცა დასძენს, რომ გამოწვევები კვლავ არსებობს და ის უკავშირდება არჩევნების თემას. კონგრესმენი იმედს გამოთქვამს, რომ ოქტომბერში, არჩევნებისთვის საქართველოში იქნება და არჩევნებს დააკვირდება.