თამარ ჩუგოშვილი - საზოგადოებრივი ჯანდაცვის შესახებ კანონპროექტი, რა სახითაც არის შემოთავაზებული, აუცილებლად გასაჩივრდება სასამართლოში და ჩემი მოლოდინია, რომ აუცილებლად გაუქმდება

საქართველოს პარლამენტის დამოუკიდებელი დეპუტატის თამარ ჩუგოშვილის განცხადებით, საზოგადოებრივი ჯანდაცვის შესახებ კანონპროექტი რა სახითაც არის შემოთავაზებული, აუცილებლად გასაჩივრდება სასამართლოში და მოლოდინი აქვს, რომ აუცილებლად გაუქმდება.

როგორც ჩუგოშვილმა პარლამენტში ჟურნალისტებს განუცხადა, კანონპროექტი კონსტიტუციასთან შესაბამისობაში არ მოდის და სერიოზული საფრთხის მატარებელი.

"რა თქმა უნდა, საზოგადოების ჯანდაცვის უზრუნველყოფა და ამ ვირუსისგან დაცვა არის სერიოზული ინტერესი. დღეს, ჩვენ გვაქვს კანონმდებლობა, რომელიც ხელისუფლებას შესაძლებლობას აძლევს, რომ მთელი რიგი შეზღუდვები და ვალდებულებები დააწესოს იმ პირთა მიმართ, რომლებიც არიან საფრთხის მატარებლები, დააწესოს გარკვეული წესები და ა.შ.. ინიციატივა, რომელიც დღეს არის შემოტანილი, ფაქტია, რომ არის ძალიან სერიოზულ კონფლიქტში კონსტიტუციასთან, მკაფიოდ არაკონსტიტუციურია. პირდაპირი ჩანაწერებია, რომელიც საქართველოს კონსტიტუციას ეწინააღმდეგება, მაგრამ გარდა იმისა, რომ არაკონსტიტუციურია, რა სახითაც არის შემოტანილი სერიოზული საფრთხის მატარებელია. ანუ, ეს ინიციატივა ამბობს იმას, რომ საქართველოს მთავრობას შესაძლებლობა ექნება გამოაცხადოს, ფაქტობრივად, საგანგებო მდგომარეობა ისე, რომ ამაში უბრალოდ გამოიროცხოს პარლამენტის როლი. ანუ, არ ერქვას საგანგებო მდგომარეობა, მაგრამ შეზღუდვები იყოს იგივე ხარისხის, რა ხარისხის შეზღუდვებიც არის შესაძლებელი საგანგებო მდგომარეობის დროს. ეს არის ფუნდამენტური აღრევა კონსტიტუციური მანდატის, ხელისუფლების დანაწილების და ა.შ.. ბოლოს და ბოლოს, არის კონკრეტული საფრთხეების შემცველი. თან, მითუმეტეს, როცა არჩევნებს ვუახლოვდებით და როცა უკვე ოპოზიციის წარმომადგენლებს უჩნდებათ ეჭვები, რომ მათი შეხვედრების, ღონისძიებების, მათი კამპანიის შესაზღუდად იქნება გამოყენებული. მე, არ ვიცი, როგორ იქნება გამოყენებული, შესაძლოა, ეს ძალიან კეთილსინდისიერადაც გამოიყენოს ხელისუფლებამ, მაგრამ თვითონ ის ნორმა და კანონი, რა სახითაც არის შემოთავაზებული, ის აუცილებლად გასაჩივრდება სასამართლოში და ჩემი მოლოდინია, რომ აუცილებლად გაუქმდება", - განაცხადა თამარ ჩუგოშვილმა.

ცნობისთვის, ახალი კანონპროექტის მიხედვით, მთავრობას ქვეყანაში შემზღუდავი ღონისძიებების გატარება საგანგებო მდგომარეობის გამოცხადების გარეშეც შეეძლება. „საზოგადოებრივი ჯანმრთელობის დაცვის შესახებ“ კანონში დაგეგმილი ცვლილებების პროექტის თანახმად, საკარანტინო ღონისძიებები ახლებურად განისაზღვრება და გულისხმობს ისეთ ღონისძიებებსაც, რაც დაკავშირებულია გადაადგილების, ეკონომიკური საქმიანობის, საკუთრების, თავშეყრის, შრომის და სხვა უფლებების შეზღუდვასთან.

თამარ გაბუნია - ეპიდემიის გავრცელების მაჩვენებელი ჯერ კონტროლის ფარგლებში რჩება, თუმცა გარკვეული შერბილებების შემდეგ, რაღაცნაირად მოვდუნდით
ზვიად კირტავა - მთავარია, ყველა მოქალაქემ გააცნობიეროს - თუ სწორად მოექცევა ჯანმრთელობას, სამუშაოს და ბიზნესსაც შეინარჩუნებს, თუ წესებს დაივიწყებს, ყველას და ყველაფერს რისკის ქვეშ დააყენებს
ქართული პრესის მიმოხილვა 01.06.2020
ფინკა ბანკის საჩუქარი ექიმებს - საუკეთესო პირობები დეპოზიტზე
ლიბერთი ბანკმა ქალთა ეკონომიკური გაძლიერების მიზნით დაგეგმილი ტრენინგების ციკლიდან პირველი ტრენინგი ჩაატარა
ხელფასის, საშემოსავლოსა და საპენსიო შენატანის გადარიცხვა ერთი ოპერაციით - მხოლოდ ტერაბანკის ბინზესბანკინგით
"დიჯიტალ ტვ" საიუბილეო აქციას იწყებს
„დრესაპ ჯგუფის“ მაღაზიები გაიხსნა