პარლამენტის ყოფილი თავმჯდომარე, საპარლამენტო უმრავლესობის წევრი, ირაკლი კობახიძე არ გამორიცხავს, რომ პრეზიდენტის გადაწყვეტილებამ, რომლის თანახმადაც მან შეწყალების აქტის საფუძველზე, „ევროპული საქართველოს“ერთ-ერთი ლიდერი, გიგი უგულავა და თავდაცვის ყოფილი მინისტრი, ირაკლი ოქრუაშვილი ციხიდან გაათავისუფლა, მმართველ პარტიას ამომრჩევლის გარკვეული რაოდენობა დააკარგინა. ამის შესახებ კობახიძემ „პალიტრანიუსის“ გადაცემაში „ 360 გრადუსი“ განაცხადა, რითაც უპასუხა შესაბამის კითხვას.
კობახიძის თქმით, ამის მიუხედავად, ამომრჩეველი მხარს დაუჭერს „არა ქურდებს და ყაჩაღებს, არამედ იმ ხელისუფლებას, რომელმაც გარდატეხა შეიტანა ქართულ პოლიტიკაში“.
„მე არ გამოვრიცხავ ამას, რადგან განწყობა იყო მძიმე და ბუნებრივია, დღემდე რჩება მძიმე. თუმცა, ეს ამომრჩეველი, ბუნებრივია, 48 მილიონის ქურდთან და მათ სატელიტებთან არ წავა. დღეს არის ორპოლუსიანი სისტემა, ან არის „ქართული ოცნება“ , ან მეორე მხარეს არიან ქურდები და ყაჩაღები. ბუნებრივია, ეს ამომრჩეველი, როცა არჩევნებზე მივა ოქტომბერში, მხარს დაუჭერს არა ქურდებს და ყაჩაღებს, არამედ იმ ხელისუფლებას, რომელმაც რადიკალურად შეცვალა ეს ყველაფერი და გარდატეხა შეიტანა პოლიტიკურ პროცესში“, - განაცხადა კობახიძემ.