მოკლული ჟურნალისტის, ჯემალ ხაშოგის, ოჯახმა მკვლელებს აპატია,- ამის შესახებ მოკლული ჟურნალისტის შვილი სალაჰი სოციალურ ქსელ „ტვიტერში“ წერს.
„ამ დალოცვილი თვის [რამადანის] დალოცვილ ღამეს ჩვენ ვიხსენებთ ღვთის სიტყვებს : თუკი ადამიანი პატიობს და ურიგდება, მას ალაჰი აჯილდოებს. ამიტომ ჩვენ, ჯემალ ხაშოგის ვაჟები ვაცხადებთ, რომ ჩვენი მამის მკვლელს ვპატიობთ,“- წერს სალაჰი.
„ბიბისის“ ინფორმაციით, ისლამური კანონის თანახმად, სასიკვდილო განაჩენი შესაძლოა შემსუბუქდეს, თუკი მსხვერპლის ოჯახი მკვლელს შეიწყალებს, თუმცა, ჯერჯერობით უცნობია, გავრცელდება თუ არა ეს წესი ჯემალ ხაშოგის საქმის შემთხვევაში.
შეგახსენებთ, Washington Post-ის საუდელი ჟურნალისტი ჯემალ ხაშოგი 2018 წლის ოქტომბერში სტამბოლში მდებარე საუდის არაბეთის საკონსულოში მოკლეს.