„ქართული ოცნების“ რვაწლიანი „მოღვაწეობა“ თავიდან ბოლომდე არის პოლიტიკური მასკარადი, ქვეყნის უკუსვლა და შემოდგომაზე ქართველი ამომრჩეველი ამ ყველაფერს წერტილს დაუსვამს, - ამის შესახებ „ევროპული საქართცველოს“ წევრმა ოთარ კახიძემ განაცხადა, რითაც პრემიერ - მინისტრის განცხადებას გამოეხმაურა.
ოთარ კახიძის თქმით, ქართველ ხალხს ჯერაც არ დავიწყებია, რომ პრემიერ-მინისტრმა მოსახლეობას თვალები დასთხარა, ხოლო პანდემიის დროს გაჭირვებულ მოსახლეობას კიდევ უფრო გაურთულა ცხოვრება.
„საქართველოს პრემიერ-მინისტრმა, რომელზეც არ დაგვივიწყებია, რომ თვალები დასთხარა ახალგაზრდებს და ერთი წელი ხდება მალე ამ თარიღიდან, პანდემიის დროს გაჭირვებულ მოსახლეობას კიდევ უფრო გაურთულა ცხოვრება და ისეთი შეზღუდვები შემოიღო, რომლითაც ეკონომიკა დამუხრუჭდა და კიდევ უფრო უკან წავიდა. მოსახლეობამ მასობრივად დაკარგა სამსახური და სამთავრობო გეგმით რაღაც 200 ლარიან დახმარებას უგდებენ ცინიკურად. ის კი კიდევ ბედავს და ოპოზიციას პოლიტიკურ მასკარადში ადანაშაულებს. „ქართული ოცნების“ რვა წლიანი „მოღვაწეობა“ თავიდან ბოლომდე არის პოლიტიკური მასკარადი, ქვეყნის უკუსვლა და შემოდგომაზე ქართველი ამომრჩეველი ამ ყველაფერს წერტილს დაუსვმას“,- განაცხადა ოთარ კახიძემ.
ცნობისთვის, როგორც პრემიერ-მინისტრმა საკოორდინაციო საბჭოს სხდომაზე განაცხადა, ოპოზიციამ პოლიტიკური მასკარადის სახით ახალი ფრონტი გახსნა.